ਕੈਨੇਡਾ: ਓਂਟਾਰੀਓ ਸਟੂਡੈਂਟ ਅਸਿਸਟੈਂਸ ਪ੍ਰੋਗਰਾਮ 'ਚ ਵੱਡੀਆਂ ਬੇਨਿਯਮੀਆਂ; ਨਿੱਜੀ ਕਰੀਅਰ ਕਾਲਜਾਂ ਦੇ ਵਿਦਿਆਰਥੀਆਂ ਦੀਆਂ ਅਰਜ਼ੀਆਂ ਸ਼ੱਕ ਦੇ ਘੇਰੇ 'ਚ

ਓਂਟਾਰੀਓ ਸਰਕਾਰ ਵੱਲੋਂ ਵਿਦਿਆਰਥੀਆਂ ਨੂੰ ਉੱਚ ਸਿੱਖਿਆ ਲਈ ਵਿੱਤੀ ਸਹਾਇਤਾ ਦੇਣ ਵਾਲੇ ਪ੍ਰੋਗਰਾਮ 'ਓਂਟਾਰੀਓ ਸਟੂਡੈਂਟ ਅਸਿਸਟੈਂਸ ਪ੍ਰੋਗਰਾਮ' (OSAP) ਵਿੱਚ ਕਥਿਤ ਧੋਖਾਧੜੀ ਅਤੇ ਬੇਨਿਯਮੀਆਂ ਦਾ ਮਾਮਲਾ ਗੰਭੀਰ ਰੂਪ ਧਾਰਨ ਕਰਦਾ ਜਾ ਰਿਹਾ ਹੈ। ਸੂਬਾ ਸਰਕਾਰ ਵੱਲੋਂ ਕਰਵਾਈ ਗਈ ਇੱਕ ਜਾਂਚ ਦੌਰਾਨ ਸਾਹਮਣੇ ਆਇਆ ਹੈ ਕਿ ਸਾਲ 2025-26 ਵਿੱਚ ਕੁਝ ਨਿੱਜੀ ਕਰੀਅਰ ਕਾਲਜਾਂ ਦੇ ਵਿਦਿਆਰਥੀਆਂ ਦੀਆਂ ਹਜ਼ਾਰਾਂ ਅਰਜ਼ੀਆਂ ਇੱਕੋ ਹੀ ਇੰਟਰਨੈੱਟ ਪਤੇ (IP ਐਡਰੈੱਸ) ਤੋਂ ਭੇਜੀਆਂ ਗਈਆਂ ਸਨ। ਇਸ ਸ਼ੱਕੀ ਗਤੀਵਿਧੀ ਤੋਂ ਬਾਅਦ ਸਰਕਾਰ ਨੇ OSAP ਤਹਿਤ ਫੰਡਾਂ ਦੀਆਂ ਅਦਾਇਗੀਆਂ ਰੋਕ ਦਿੱਤੀਆਂ ਹਨ, ਜਿਸ ਕਾਰਨ ਅਸਲ ਲੋੜਵੰਦ ਵਿਦਿਆਰਥੀਆਂ ਦੀ ਪੜ੍ਹਾਈ ਅਤੇ ਰੋਜ਼ਾਨਾ ਦੇ ਗੁਜ਼ਾਰੇ 'ਤੇ ਮਾੜਾ ਅਸਰ ਪੈ ਰਿਹਾ ਹੈ। ਕੀ ਹੈ OSAP ਅਤੇ ਇਸ ਦਾ ਲਾਭ? ਓਂਟਾਰੀਓ ਸਰਕਾਰ ਵੱਲੋਂ ਚਲਾਇਆ ਜਾਂਦਾ ਇਹ ਪ੍ਰੋਗਰਾਮ ਸੂਬੇ ਦੇ ਕਾਲਜਾਂ ਅਤੇ ਯੂਨੀਵਰਸਿਟੀਆਂ ਵਿੱਚ ਪੜ੍ਹਨ ਵਾਲੇ ਯੋਗ ਵਿਦਿਆਰਥੀਆਂ ਨੂੰ ਗ੍ਰਾਂਟ ਅਤੇ ਕਰਜ਼ੇ ਦੇ ਰੂਪ ਵਿੱਚ ਵਿੱਤੀ ਮਦਦ ਪ੍ਰਦਾਨ ਕਰਦਾ ਹੈ। ਗ੍ਰਾਂਟ ਦੀ ਰਕਮ ਵਾਪਸ ਨਹੀਂ ਕਰਨੀ ਪੈਂਦੀ, ਜਦਕਿ ਕਰਜ਼ੇ ਦੀ ਅਦਾਇਗੀ ਪੜ੍ਹਾਈ ਪੂਰੀ ਹੋਣ ਤੋਂ ਬਾਅਦ ਕੀਤੀ ਜਾਂਦੀ ਹੈ। ਵਿਦਿਆਰਥੀ ਇਸ ਰਾਸ਼ੀ ਨਾਲ ਆਪਣੀ ਟਿਊਸ਼ਨ ਫੀਸ, ਕਿਤਾਬਾਂ ਅਤੇ ਰਹਿਣ-ਸਹਿਣ ਦੇ ਖ਼ਰਚੇ ਪੂਰੇ ਕਰਦੇ ਹਨ। ਇਹ ਸਹਾਇਤਾ ਸਿਰਫ਼ ਕੈਨੇਡੀਅਨ ਨਾਗਰਿਕਾਂ ਜਾਂ ਸਥਾਈ ਵਸਨੀਕਾਂ (PR) ਲਈ ਹੈ, ਜਦਕਿ ਅੰਤਰਰਾਸ਼ਟਰੀ ਵਿਦਿਆਰਥੀ ਇਸ ਪ੍ਰੋਗਰਾਮ ਲਈ ਯੋਗ ਨਹੀਂ ਹਨ। ਆਂਕੜਿਆਂ ਮੁਤਾਬਕ, 2024-25 ਦੌਰਾਨ ਲਗਭਗ 4.94 ਲੱਖ ਵਿਦਿਆਰਥੀਆਂ ਨੇ ਇਸ ਤਹਿਤ ਅਰਜ਼ੀਆਂ ਦਿੱਤੀਆਂ ਸਨ ਅਤੇ ਸਰਕਾਰ ਨੇ ਲਗਭਗ 1 ਅਰਬ ਡਾਲਰ ਦੀ ਗ੍ਰਾਂਟ ਵੰਡੀ ਸੀ। ਇੱਕੋ IP ਐਡਰੈੱਸ ਤੋਂ ਹਜ਼ਾਰਾਂ ਅਰਜ਼ੀਆਂ ਨੇ ਖੜ੍ਹੇ ਕੀਤੇ ਸਵਾਲ ਮੰਤਰਾਲੇ ਮੁਤਾਬਕ, ਬਰੈਂਪਟਨ ਈਸਟ ਸਥਿਤ 'ਅਕੈਡਮੀ ਆਫ਼ ਲਰਨਿੰਗ ਕੈਂਪਸ' ਵਿੱਚ 2025-26 ਦੌਰਾਨ ਪ੍ਰਾਪਤ ਹੋਈਆਂ 6,001 ਅਰਜ਼ੀਆਂ ਵਿੱਚੋਂ 3,136 ਅਰਜ਼ੀਆਂ (52 ਫ਼ੀਸਦੀ) ਇੱਕੋ IP ਐਡਰੈੱਸ ਤੋਂ ਭੇਜੀਆਂ ਗਈਆਂ ਸਨ। ਨਾਰਥ ਯਾਰਕ ਕੈਂਪਸ ਵਿੱਚ 6,070 ਵਿੱਚੋਂ 3,460 (57 ਫ਼ੀਸਦੀ) ਅਤੇ ਬੇਅ ਕੈਂਪਸ ਵਿੱਚ 6,966 ਵਿੱਚੋਂ 1,736 ਅਰਜ਼ੀਆਂ ਇੱਕ ਹੀ ਇੰਟਰਨੈੱਟ ਪਤੇ ਤੋਂ ਆਈਆਂ। ਸਰਕਾਰ ਨੂੰ ਸ਼ੱਕ ਹੈ ਕਿ ਕੁਝ ਨਿੱਜੀ ਕਾਲਜ ਵਿਦਿਆਰਥੀਆਂ ਦੀ ਥਾਂ ਆਪ ਹੀ ਅਰਜ਼ੀਆਂ ਭਰ ਰਹੇ ਸਨ, ਜੋ ਨਿਯਮਾਂ ਦੇ ਖ਼ਿਲਾਫ਼ ਹੈ। ਹਾਲਾਂਕਿ, ਕਾਲਜ ਪ੍ਰਬੰਧਕਾਂ ਦਾ ਕਹਿਣਾ ਹੈ ਕਿ ਇੱਕੋ ਇਮਾਰਤ ਜਾਂ ਕੈਂਪਸ ਦਾ ਵਾਈ-ਫਾਈ ਵਰਤਣ ਕਾਰਨ IP ਐਡਰੈੱਸ ਇੱਕ ਹੋਣਾ ਸੰਭਵ ਹੈ। ਨਿੱਜੀ ਕਾਲਜਾਂ ਨੂੰ ਵੰਡੀਆਂ ਕਰੋੜਾਂ ਦੀਆਂ ਗ੍ਰਾਂਟਾਂ ਜਾਂਚ ਦੇ ਘੇਰੇ 'ਚ ਕੈਨੇਡੀਅਨ ਪ੍ਰੈੱਸ ਦੀ ਰਿਪੋਰਟ ਅਨੁਸਾਰ, 2024-25 ਦੌਰਾਨ ਸਿਰਫ਼ ਸੱਤ ਕਰੀਅਰ ਕਾਲਜਾਂ ਦੇ ਵਿਦਿਆਰਥੀਆਂ ਨੂੰ ਲਗਭਗ 38.5 ਕਰੋੜ ਡਾਲਰ ਦੀਆਂ ਸੂਬਾਈ ਗ੍ਰਾਂਟਾਂ ਦਿੱਤੀਆਂ ਗਈਆਂ, ਜੋ ਸੂਬੇ ਦੇ ਸਾਰੇ ਸਰਕਾਰੀ ਫੰਡ ਪ੍ਰਾਪਤ ਕਾਲਜਾਂ ਦੇ ਵਿਦਿਆਰਥੀਆਂ ਨੂੰ ਮਿਲੀ ਕੁੱਲ ਗ੍ਰਾਂਟ ਦੇ ਬਰਾਬਰ ਹੈ। 'ਕਰੀਅਰ ਕਾਲਜ ਓਨਟੇਰੀਓ' ਨੇ 2023 ਵਿੱਚ ਹੀ ਅਜਿਹੀਆਂ ਸ਼ੱਕੀ ਗਤੀਵਿਧੀਆਂ ਬਾਰੇ ਚੇਤਾਵਨੀ ਦਿੱਤੀ ਸੀ। ਵਿਦਿਆਰਥੀਆਂ ਦੀਆਂ ਵਧੀਆਂ ਮੁਸ਼ਕਲਾਂ ਅਤੇ ਪੰਜਾਬ 'ਚ ਵੀ ਮਾਮਲਾ ਦਰਜ ਅਦਾਇਗੀਆਂ ਰੋਕਣ ਨਾਲ ਆਮ ਵਿਦਿਆਰਥੀਆਂ ਦਾ ਬਜਟ ਵਿਗੜ ਗਿਆ ਹੈ ਅਤੇ ਉਹ ਆਪਣੇ ਖ਼ਰਚੇ ਪੂਰੇ ਕਰਨ ਲਈ ਵਾਧੂ ਕੰਮ ਕਰਨ ਲਈ ਮਜ਼ਬੂਰ ਹਨ। ਇਸ ਤੋਂ ਇਲਾਵਾ, ਇਸ ਮਾਮਲੇ ਦੀ ਗੂੰਜ ਪੰਜਾਬ ਵਿੱਚ ਵੀ ਸੁਣਾਈ ਦਿੱਤੀ, ਜਿੱਥੇ ਸੋਸ਼ਲ ਮੀਡੀਆ 'ਤੇ OSAP ਫੰਡਾਂ ਦੀ ਦੁਰਵਰਤੋਂ ਬਾਰੇ ਪਾਈਆਂ ਗਈਆਂ ਅਣ-ਤਸਦੀਕਸ਼ੁਦਾ ਪੋਸਟਾਂ ਤੋਂ ਬਾਅਦ ਪੰਜਾਬ ਪੁਲਿਸ ਦੇ ਸਾਈਬਰ ਸੈੱਲ ਨੇ ਅਣਪਛਾਤੇ ਵਿਅਕਤੀਆਂ ਵਿਰੁੱਧ ਮਾਮਲਾ ਦਰਜ ਕੀਤਾ ਸੀ। ਓਂਟਾਰੀਓ ਦੇ ਮੰਤਰੀ ਨੋਲਨ ਕੁਇਨ ਨੇ ਕਿਹਾ ਹੈ ਕਿ ਸਰਕਾਰ ਨਿੱਜੀ ਸਿੱਖਿਆ ਸੰਸਥਾਵਾਂ ਦੀ ਪ੍ਰਵਾਨਗੀ ਪ੍ਰਕਿਰਿਆ ਨੂੰ ਹੋਰ ਮਜ਼ਬੂਤ ਕਰੇਗੀ, ਹਾਲਾਂਕਿ ਆਡਿਟ ਰਿਪੋਰਟ ਨੂੰ ਜਨਤਕ ਨਾ ਕਰਨ ਦਾ ਫ਼ੈਸਲਾ ਲਿਆ ਗਿਆ ਹੈ।