ਜੰਮੂ-ਕਸ਼ਮੀਰ FDA ਦੀ ਵੱਡੀ ਕਾਰਵਾਈ, ਘਿਓ ਦੇ 10 ਬੈਚਾਂ ਦੀ ਵਿਕਰੀ ਅਤੇ ਵੰਡ ’ਤੇ ਰੋਕ

ਜੰਮੂ-ਕਸ਼ਮੀਰ ਫੂਡ ਐਂਡ ਡਰੱਗਜ਼ ਐਡਮਿਨਿਸਟ੍ਰੇਸ਼ਨ (FDA) ਨੇ ਐਤਵਾਰ ਨੂੰ ਘਿਓ ਦੇ 10 ਗੈਰ-ਅਨੁਕੂਲ ਬ੍ਰਾਂਡਾਂ/ਬੈਚਾਂ ਦੀ ਵਿਕਰੀ, ਸਟੋਰੇਜ, ਵੰਡ ਅਤੇ ਪ੍ਰਦਰਸ਼ਨ ’ਤੇ ਤੁਰੰਤ ਪ੍ਰਭਾਵ ਨਾਲ ਰੋਕ ਲਗਾ ਦਿੱਤੀ। ਪ੍ਰਸ਼ਾਸਨ ਮੁਤਾਬਕ ਲੈਬਾਰਟਰੀ ਜਾਂਚ ਦੌਰਾਨ ਇਨ੍ਹਾਂ ਉਤਪਾਦਾਂ ਨੂੰ ਘਟੀਆ, ਅਸੁਰੱਖਿਅਤ ਅਤੇ ਗਲਤ ਬ੍ਰਾਂਡਿੰਗ ਵਾਲਾ ਪਾਇਆ ਗਿਆ। ਜੰਮੂ-ਕਸ਼ਮੀਰ FDA ਵੱਲੋਂ ਜਾਰੀ ਹੁਕਮ ਵਿੱਚ ਕਿਹਾ ਗਿਆ ਹੈ ਕਿ ਇਹ ਕਾਰਵਾਈ ਫੂਡ ਸੇਫਟੀ ਐਂਡ ਸਟੈਂਡਰਡਜ਼ ਐਕਟ, 2006 ਦੇ ਤਹਿਤ ਕੀਤੀ ਗਈ ਹੈ। ਪ੍ਰਭਾਵਿਤ ਨਮੂਨਿਆਂ ਦੀ ਜਾਂਚ ਗਾਜ਼ੀਆਬਾਦ ਸਥਿਤ ਨੋਟੀਫਾਈਡ ਫੂਡ ਐਨਾਲਿਸਟ, ਨੈਸ਼ਨਲ ਫੂਡ ਲੈਬਾਰਟਰੀ ਅਤੇ ਕਸ਼ਮੀਰ ਦੀ ਫੂਡ ਟੈਸਟਿੰਗ ਲੈਬਾਰਟਰੀ ਵਿੱਚ ਕੀਤੀ ਗਈ ਸੀ। ਇਨ੍ਹਾਂ ਬ੍ਰਾਂਡਾਂ ਦੇ ਬੈਚਾਂ ’ਤੇ ਰੋਕ FDA ਵੱਲੋਂ ਪਾਬੰਦੀਸ਼ੁਦਾ ਉਤਪਾਦਾਂ ਵਿੱਚ ਡੇਅਰੀ ਮੋਹਨ, ਅਪਨਾ ਡੇਅਰੀ ਮਿਲਕ, ਮਿਲਕ ਬਾਈਟ, ਨੰਦਨੀ, ਸ਼ਾਹੀ ਤਾਜ, ਦਾਵਤ ਫਰੈਸ਼, ਨੰਦ ਕ੍ਰਿਸ਼ਨਾ, ਵੰਦੂ, ਡੇਅਰੀ ਮਿਲਕ ਅਤੇ ਮੋਹਨ ਡੇਅਰੀ ਸ਼ਾਮਲ ਹਨ। ਜਾਂਚ ਵਿੱਚ ਜਿਨ੍ਹਾਂ ਖਾਸ ਬੈਚਾਂ ਨੂੰ ਗੈਰ-ਅਨੁਕੂਲ ਪਾਇਆ ਗਿਆ, ਉਨ੍ਹਾਂ ਵਿੱਚ ਡੇਅਰੀ ਮੋਹਨ ਦੇਸੀ ਘਿਓ (ਬੈਚ ਨੰ. 5), ਅਪਨਾ ਡੇਅਰੀ ਮਿਲਕ ਦੇਸੀ ਘਿਓ (DM-6), ਮਿਲਕ ਬਾਈਟ ਕਾਉ ਘਿਓ (137), ਨੰਦਨੀ ਦੇਸੀ ਘਿਓ (ND-28), ਸ਼ਾਹੀ ਤਾਜ ਦੇਸੀ ਘਿਓ (134), ਦਾਵਤ ਫਰੈਸ਼ (VT09), ਨੰਦ ਕ੍ਰਿਸ਼ਨਾ ਕਾਉ ਘਿਓ (PC-05-26), ਵੰਦੂ ਕਾਉ ਘਿਓ (D143), ਡੇਅਰੀ ਮਿਲਕ ਦੇਸੀ ਘਿਓ (OM12) ਅਤੇ ਮੋਹਨ ਡੇਅਰੀ ਘਿਓ (6) ਸ਼ਾਮਲ ਹਨ। ਇਨ੍ਹਾਂ ਪ੍ਰਭਾਵਿਤ ਬੈਚਾਂ ਦੇ ਨਮੂਨੇ ਜੰਮੂ-ਕਸ਼ਮੀਰ ਦੇ ਵੱਖ-ਵੱਖ ਇਲਾਕਿਆਂ ਤੋਂ ਇਕੱਠੇ ਕੀਤੇ ਗਏ ਸਨ। ਇਨ੍ਹਾਂ ਵਿੱਚ ਅਨੰਤਨਾਗ, ਸ਼ਾਂਗਸ, ਲਾਰਨੂ, ਬਿਜਬੇਹਾੜਾ, ਸਾਂਬਾ, ਕਠੂਆ, ਜੰਮੂ, ਤ੍ਰਾਲ ਅਤੇ ਪੰਪੋਰ ਸ਼ਾਮਲ ਹਨ। ਲੈਬ ਜਾਂਚ ਵਿੱਚ ਕੀ ਸਾਹਮਣੇ ਆਇਆ? ਪ੍ਰਯੋਗਸ਼ਾਲਾ ਜਾਂਚ ਦੌਰਾਨ ਕੁਝ ਨਮੂਨਿਆਂ ਵਿੱਚ ਬੀਟਾ-ਸਿਟੋਸਟ੍ਰੋਲ ਅਤੇ ਵਿਦੇਸ਼ੀ ਬਨਸਪਤੀ ਚਰਬੀ ਦੀ ਮੌਜੂਦਗੀ ਸਾਹਮਣੇ ਆਈ। ਇਸ ਤੋਂ ਇਲਾਵਾ ਬਾਉਡੌਇਨ ਟੈਸਟ ਪਾਜ਼ੀਟਿਵ ਪਾਇਆ ਗਿਆ। ਜਾਂਚ ਵਿੱਚ ਅਸਧਾਰਨ ਫੈਟੀ-ਐਸਿਡ ਪ੍ਰੋਫਾਈਲ ਅਤੇ ਨਿਰਧਾਰਤ ਭੌਤਿਕ-ਰਸਾਇਣਕ ਮਾਪਦੰਡਾਂ ਤੋਂ ਭਟਕਾਅ ਵੀ ਦਰਜ ਕੀਤਾ ਗਿਆ। FBO ਅਤੇ ਵਿਕਰੇਤਾਵਾਂ ਨੂੰ ਤੁਰੰਤ ਵਿਕਰੀ ਰੋਕਣ ਦੇ ਹੁਕਮ FDA ਨੇ ਸਾਰੇ ਫੂਡ ਬਿਜ਼ਨਸ ਆਪਰੇਟਰਾਂ (FBO), ਥੋਕ ਵਿਕਰੇਤਾਵਾਂ, ਵਿਤਰਕਾਂ ਅਤੇ ਪ੍ਰਚੂਨ ਵਿਕਰੇਤਾਵਾਂ ਨੂੰ ਪ੍ਰਭਾਵਿਤ ਬੈਚਾਂ ਦੀ ਵਿਕਰੀ ਅਤੇ ਵੰਡ ਤੁਰੰਤ ਰੋਕਣ ਲਈ ਕਿਹਾ ਹੈ। ਉਨ੍ਹਾਂ ਨੂੰ ਇਹ ਵੀ ਯਕੀਨੀ ਬਣਾਉਣ ਦੇ ਨਿਰਦੇਸ਼ ਦਿੱਤੇ ਗਏ ਹਨ ਕਿ ਪਾਬੰਦੀਸ਼ੁਦਾ ਉਤਪਾਦ ਬਾਜ਼ਾਰ ਵਿੱਚ ਉਪਲਬਧ ਨਾ ਰਹਿਣ। ਸਬੰਧਤ FBOਜ਼ ਨੂੰ 48 ਘੰਟਿਆਂ ਦੇ ਅੰਦਰ ਪ੍ਰਭਾਵਿਤ ਬੈਚਾਂ ਦੇ ਸਟਾਕ ਦੀ ਸਥਿਤੀ ਸਬੰਧਤ ਮਨੋਨੀਤ ਅਧਿਕਾਰੀ ਨੂੰ ਦੱਸਣ ਲਈ ਵੀ ਕਿਹਾ ਗਿਆ ਹੈ। ਲਾਗੂ ਕਰਨ ਵਾਲੇ ਅਧਿਕਾਰੀਆਂ ਨੂੰ ਸਖ਼ਤ ਨਿਗਰਾਨੀ ਰੱਖਣ ਅਤੇ ਪਾਬੰਦੀਸ਼ੁਦਾ ਖਾਧ ਪਦਾਰਥਾਂ ਦੀ ਹੋਰ ਵਿਕਰੀ ਜਾਂ ਵੰਡ ਰੋਕਣ ਲਈ ਲੋੜੀਂਦੀ ਕਾਰਵਾਈ ਕਰਨ ਦੇ ਨਿਰਦੇਸ਼ ਦਿੱਤੇ ਗਏ ਹਨ। ਘਿਓ ਲਈ ਕੀ ਹਨ ਖੁਰਾਕ ਸੁਰੱਖਿਆ ਮਾਪਦੰਡ? ਪ੍ਰਸ਼ਾਸਨ ਨੇ ਸਪੱਸ਼ਟ ਕੀਤਾ ਹੈ ਕਿ ਲਾਗੂ ਖੁਰਾਕ ਸੁਰੱਖਿਆ ਮਾਪਦੰਡਾਂ ਅਨੁਸਾਰ ਘਿਓ ਸਿਰਫ਼ ਦੁੱਧ ਜਾਂ ਦੁੱਧ ਤੋਂ ਬਣੇ ਉਤਪਾਦਾਂ ਤੋਂ ਪ੍ਰਾਪਤ ਹੋਣਾ ਚਾਹੀਦਾ ਹੈ। ਦੁੱਧ ਦੀ ਚਰਬੀ ਤੋਂ ਇਲਾਵਾ ਕਿਸੇ ਹੋਰ ਸਰੋਤ ਤੋਂ ਪ੍ਰਾਪਤ ਵਾਧੂ ਪਦਾਰਥ ਵਾਲੇ ਘਿਓ ਨੂੰ ਵਿਕਰੀ ਲਈ ਮਨਜ਼ੂਰੀ ਨਹੀਂ ਹੈ। ਜਨਤਕ ਸਿਹਤ ਅਤੇ ਖਪਤਕਾਰਾਂ ਦੀ ਸੁਰੱਖਿਆ ਨੂੰ ਧਿਆਨ ਵਿੱਚ ਰੱਖਦਿਆਂ ਇਹ ਪਾਬੰਦੀ ਜੰਮੂ-ਕਸ਼ਮੀਰ ਵਿੱਚ ਤੁਰੰਤ ਪ੍ਰਭਾਵ ਨਾਲ ਲਾਗੂ ਕੀਤੀ ਗਈ ਹੈ। ਖਪਤਕਾਰਾਂ ਨੂੰ ਵੀ ਚੌਕਸ ਰਹਿਣ ਦੀ ਅਪੀਲ FDA ਨੇ ਖਪਤਕਾਰਾਂ ਨੂੰ ਘਿਓ ਖਰੀਦਣ ਸਮੇਂ ਸਾਵਧਾਨ ਰਹਿਣ ਅਤੇ ਉਤਪਾਦ ਦਾ ਬ੍ਰਾਂਡ, ਬੈਚ ਨੰਬਰ ਅਤੇ ਪੈਕਿੰਗ ਦੀ ਮਿਤੀ ਧਿਆਨ ਨਾਲ ਜਾਂਚਣ ਦੀ ਅਪੀਲ ਕੀਤੀ ਹੈ। ਖਪਤਕਾਰਾਂ ਅਤੇ ਪ੍ਰਚੂਨ ਵਿਕਰੇਤਾਵਾਂ ਨੂੰ ਕਿਹਾ ਗਿਆ ਹੈ ਕਿ ਜੇਕਰ ਪਾਬੰਦੀਸ਼ੁਦਾ ਬੈਚ ਵਿਕਰੀ ਲਈ ਉਪਲਬਧ ਮਿਲੇ ਜਾਂ ਉਸ ਦੀ ਵਿਕਰੀ ਹੁੰਦੀ ਦਿਖਾਈ ਦੇਵੇ ਤਾਂ ਇਸ ਦੀ ਜਾਣਕਾਰੀ ਤੁਰੰਤ ਸਬੰਧਤ ਫੂਡ ਸੇਫਟੀ ਅਧਿਕਾਰੀਆਂ ਨੂੰ ਦਿੱਤੀ ਜਾਵੇ। FDA ਮੁਤਾਬਕ ਇਹ ਪਾਬੰਦੀ ਜਨਤਕ ਹਿੱਤ ਵਿੱਚ ਇੱਕ ਸਾਵਧਾਨੀ ਵਾਲਾ ਕਦਮ ਹੈ। ਹਾਲਾਂਕਿ, ਇਸ ਨਾਲ ਸਬੰਧਤ ਫੂਡ ਬਿਜ਼ਨਸ ਆਪਰੇਟਰਾਂ ਦਾ FSSAI-ਅਧਿਸੂਚਿਤ ਰੈਫਰਲ ਲੈਬਾਰਟਰੀ ਰਾਹੀਂ ਦੁਬਾਰਾ ਵਿਸ਼ਲੇਸ਼ਣ ਕਰਵਾਉਣ ਦਾ ਕਾਨੂੰਨੀ ਅਧਿਕਾਰ ਪ੍ਰਭਾਵਿਤ ਨਹੀਂ ਹੁੰਦਾ। ਇਹ ਪ੍ਰਕਿਰਿਆ ਫੂਡ ਸੇਫਟੀ ਐਂਡ ਸਟੈਂਡਰਡਜ਼ ਐਕਟ, 2006 ਅਤੇ ਇਸ ਦੇ ਤਹਿਤ ਬਣਾਏ ਨਿਯਮਾਂ ਅਨੁਸਾਰ ਹੋਵੇਗੀ।