ਖੁਰਾਕੀ ਮਹਿੰਗਾਈ ‘ਤੇ ਸਿਆਸੀ ਗਰਮਾਹਟ, ਪੀਅਰ ਪੋਲੀਏਵਰ ਵੱਲੋਂ ਟੈਕਸ ਰੱਦ ਕਰਨ ਦੀ ਮੰਗ

ਖਾਣ-ਪੀਣ ਨਾਲ ਸੰਬੰਧਿਤ ਟੈਕਸਾਂ ਨੂੰ ਰੱਦ ਕਰਨ ਦੀ ਮੰਗ ਕਰਦਿਆਂ ਫੈਡਰਲ ਸਰਕਾਰ ਨੂੰ ਨਿਸ਼ਾਨੇ ‘ਤੇ ਲਿਆ ਹੈ। ਉਨ੍ਹਾਂ ਨੇ ਪ੍ਰਧਾਨ ਮੰਤਰੀ Mark Carney ਨੂੰ ਭੇਜੇ ਪੱਤਰ ਵਿੱਚ ਖੁਰਾਕ ਨੂੰ ਕਿਫ਼ਾਇਤੀ ਬਣਾਉਣ ਲਈ ਖਾਸ ਯੋਜਨਾ ਲਾਗੂ ਕਰਨ ਦੀ ਅਪੀਲ ਕੀਤੀ ਹੈ, ਜਿਸ ਨਾਲ ਗਰੌਸਰੀ ਸਟੋਰਾਂ ਵਿਚ ਮੁਕਾਬਲਾ ਵਧੇ ਅਤੇ ਉਤਪਾਦਨ ਤੇ ਪੈਕਿੰਗ ‘ਤੇ ਲੱਗੇ ਲੁਕੇ ਹੋਏ ਟੈਕਸ ਹਟਾਏ ਜਾਣ। ਪੋਲੀਏਵਰ ਨੇ ਆਪਣੇ ਪੱਤਰ ਵਿੱਚ ਲਿਖਿਆ ਕਿ ਕੈਨੇਡਾ ਦੇ ਲੋਕ ਹਰ ਹਫ਼ਤੇ ਪਰਿਵਾਰ ਲਈ ਰਾਸ਼ਣ ਖਰੀਦਦੇ ਸਮੇਂ ਪਹਿਲਾਂ ਨਾਲੋਂ ਕਾਫ਼ੀ ਵੱਧ ਕੀਮਤਾਂ ਦਾ ਸਾਹਮਣਾ ਕਰ ਰਹੇ ਹਨ। ਉਨ੍ਹਾਂ ਦੇ ਮੁਤਾਬਕ ਪਿਛਲੇ ਇੱਕ ਸਾਲ ਦੌਰਾਨ ਫੂਡ ਪਦਾਰਥਾਂ ਦੀਆਂ ਕੀਮਤਾਂ ਵਿੱਚ 7.3 ਫੀਸਦੀ ਤੱਕ ਵਾਧਾ ਹੋਇਆ ਹੈ ਅਤੇ ਹਾਲੀਆ ਸਾਲਾਂ ਵਿੱਚ ਦੇਸ਼ ਨੇ ਜੀ-7 ਦੇਸ਼ਾਂ ਵਿੱਚ ਸਭ ਤੋਂ ਉੱਚੀ ਫੂਡ ਮਹਿੰਗਾਈ ਦਰਾਂ ਵਿੱਚੋਂ ਇੱਕ ਦਰਜ ਕੀਤੀ ਹੈ। Statistics Canada ਦੇ ਅੰਕੜਿਆਂ ਅਨੁਸਾਰ ਜਨਵਰੀ 2025 ਨਾਲ ਤੁਲਨਾ ਕਰਨ ‘ਤੇ ਕਾਫੀ ਦੀ ਕੀਮਤ ਲਗਭਗ 30 ਫੀਸਦੀ ਵਧੀ ਹੈ, ਜਦਕਿ ਮੀਟ ਦੀ ਕੀਮਤ ਕਰੀਬ 19 ਫੀਸਦੀ ਵਧੀ ਹੈ। ਇਹ ਅੰਕੜੇ ਘਰੇਲੂ ਬਜਟ ‘ਤੇ ਵੱਧਦੇ ਬੋਝ ਨੂੰ ਦਰਸਾਉਂਦੇ ਹਨ। ਇਸ ਮਹੀਨੇ ਦੀ ਸ਼ੁਰੂਆਤ ਵਿੱਚ Bank of Canada ਨੇ ਵੀ ਕਿਹਾ ਸੀ ਕਿ 2025 ਦੌਰਾਨ ਗਰੌਸਰੀ ਕੀਮਤਾਂ ਵਿੱਚ ਵਾਧੇ ਦਾ ਇੱਕ ਵੱਡਾ ਕਾਰਨ ਆਯਾਤ ਕੀਤੇ ਸਮਾਨ ਦੀ ਮਹਿੰਗਾਈ ਹੈ। 2022 ਤੋਂ ਲੈ ਕੇ ਹੁਣ ਤੱਕ ਗਰੌਸਰੀ ਕੀਮਤਾਂ ਵਿੱਚ ਕਰੀਬ 22 ਫੀਸਦੀ ਵਾਧਾ ਹੋਇਆ ਹੈ, ਜਦਕਿ ਹੋਰ ਖਪਤਕਾਰ ਕੀਮਤਾਂ ਵਿੱਚ ਔਸਤ 13 ਫੀਸਦੀ ਵਾਧਾ ਦਰਜ ਕੀਤਾ ਗਿਆ। ਪੋਲੀਏਵਰ ਨੇ ਦਲੀਲ ਦਿੱਤੀ ਕਿ ਮਹਿੰਗਾਈ ਦਾ ਅਸਰ ਸਿਰਫ਼ ਗਰੌਸਰੀ ਤੱਕ ਸੀਮਤ ਨਹੀਂ ਰਿਹਾ। ਫਾਸਟ-ਫੂਡ ਦੁਪਹਿਰ ਦੇ ਖਾਣੇ ਜਾਂ ਬਾਹਰੋਂ ਮੰਗਵਾਏ ਰਾਤ ਦੇ ਭੋਜਨ ਦੀਆਂ ਕੀਮਤਾਂ ਵੀ ਲਗਭਗ 14 ਫੀਸਦੀ ਵਧ ਚੁੱਕੀਆਂ ਹਨ, ਜਦਕਿ ਰੈਸਟੋਰੈਂਟਾਂ ਵਿੱਚ ਭੋਜਨ ਦੀਆਂ ਕੀਮਤਾਂ ਪਿਛਲੇ 12 ਮਹੀਨਿਆਂ ਵਿੱਚ 12.3 ਫੀਸਦੀ ਵਧੀਆਂ ਹਨ। ਵਿਸ਼ਲੇਸ਼ਕ ਮੰਨਦੇ ਹਨ ਕਿ ਫੂਡ ਮਹਿੰਗਾਈ ਆਉਣ ਵਾਲੇ ਸਮੇਂ ਵਿੱਚ ਵੀ ਸਿਆਸੀ ਚਰਚਾ ਦਾ ਕੇਂਦਰ ਰਹਿ ਸਕਦੀ ਹੈ, ਕਿਉਂਕਿ ਇਹ ਸਿੱਧਾ ਲੋਕਾਂ ਦੇ ਰੋਜ਼ਾਨਾ ਖਰਚ ਨਾਲ ਜੁੜੀ ਹੋਈ ਹੈ।