ਪ੍ਰਾਇਮਰੀ ਸਕੂਲਾਂ ਦੇ ਵਿਦਿਆਰਥੀਆਂ ਲਈ ਵਿਗਿਆਨਕ ਟੂਰ ਬਣਿਆ ਸਿੱਖਿਆਤਮਕ ਤਜਰਬਾ

ਪੰਜਾਬ ਦੇ ਵੱਖ-ਵੱਖ ਪ੍ਰਾਇਮਰੀ ਸਕੂਲਾਂ ਦੇ ਵਿਦਿਆਰਥੀਆਂ ਲਈ ਆਯੋਜਿਤ ਇੱਕ ਸਿੱਖਿਆਤਮਕ ਟੂਰ ਯਾਦਗਾਰ ਸਾਬਤ ਹੋਇਆ। ਸੈਂਟਰ ਗਾਂਧਰਾਂ ਦੇ ਪੰਜ ਸਕੂਲ—ਭੋਡੀਪੁਰ, ਬਾੜਾ ਸਿੱਧਪੁਰ, ਲੱਧੜਾਂ, ਦਰਗਾਵਾਲ ਅਤੇ ਬਿੱਲਾ ਨਵਾਬ—ਅਤੇ ਸੈਂਟਰ ਮੱਲ੍ਹੀਆਂ ਕਲਾਂ ਦੇ ਤਿੰਨ ਸਕੂਲ—ਬੱਲ ਕੋਹਨਾ, ਬੱਲ ਨੌਂ ਅਤੇ ਸੀਓਵਾਲ—ਦੇ ਵਿਦਿਆਰਥੀਆਂ ਨੂੰ ਉਨ੍ਹਾਂ ਦੇ ਅਧਿਆਪਕਾਂ ਅਤੇ ਸਹਿਯੋਗੀਆਂ ਦੀ ਅਗਵਾਈ ਹੇਠ ਕਪੂਰਥਲਾ ਸਥਿਤ ਪੁਸ਼ਪਾ ਗੁਜਰਾਲ ਸਾਇੰਸ ਸਿਟੀ ਅਤੇ ਬਲ੍ਹੇਰ ਖ਼ਾਨਪੁਰ ਵਿਖੇ ਗੁਰਦੁਆਰਾ ਟਾਹਲੀ ਸਾਹਿਬ ਲਿਜਾਇਆ ਗਿਆ। ਟੂਰ ਦੌਰਾਨ ਬਲਜੀਤ ਸਿੰਘ ਕੁਲਾਰ ਨੇ ਨਿਗਰਾਨ ਵਜੋਂ ਜ਼ਿੰਮੇਵਾਰੀ ਨਿਭਾਈ। ਸਾਇੰਸ ਸਿਟੀ ਵਿੱਚ ਐਜੂਕੇਸ਼ਨ ਅਫ਼ਸਰ ਹਰਸਿਮਰਨ ਕੌਰ ਅਤੇ ਮਨਪ੍ਰੀਤ ਕੌਰ ਨੇ ‘ਕੈਂਡਲ ਸਾਇੰਸ ਐਕਸਪੈਰੀਮੈਂਟ’ ਵਰਕਸ਼ਾਪ ਰਾਹੀਂ ਵਿਦਿਆਰਥੀਆਂ ਦੀ ਵਿਗਿਆਨਕ ਸਮਝ ਨੂੰ ਵਧਾਇਆ। ਇਸ ਤੋਂ ਇਲਾਵਾ ਮਾਸਟਰ ਗੁਰਦੀਪ ਸਿੰਘ ਅਤੇ ਜਸਵੀਰ ਸਿੰਘ ਸ਼ਾਇਰ ਨੇ ਟੂਰ ਗਾਈਡ ਵਜੋਂ ਸੇਵਾ ਨਿਭਾਉਂਦਿਆਂ ਸਾਇੰਸ ਸਿਟੀ ਅਤੇ ਗੁਰਦੁਆਰਾ ਟਾਹਲੀ ਸਾਹਿਬ ਦੀ ਇਤਿਹਾਸਕ ਮਹੱਤਤਾ ਬਾਰੇ ਵਿਸਥਾਰ ਨਾਲ ਜਾਣਕਾਰੀ ਦਿੱਤੀ। ਸਿਹਤ ਸੰਬੰਧੀ ਸਹਾਇਤਾ ਲਈ ਆਸ਼ਾ ਵਰਕਰ ਜਸਵੀਰ ਕੌਰ ਨੇ ਟੂਰ ਦੌਰਾਨ ਵਿਦਿਆਰਥੀਆਂ ਨੂੰ ਮੈਡੀਕਲ ਸੇਵਾਵਾਂ ਮੁਹੱਈਆ ਕਰਵਾਈਆਂ। ਇਸ ਦੋਹਰੇ ਵਿਗਿਆਨਕ ਅਤੇ ਧਾਰਮਿਕ ਦੌਰੇ ਦੌਰਾਨ ਬੱਚਿਆਂ ਨੇ ਸਿੱਖਿਆ ਦੇ ਨਾਲ-ਨਾਲ ਆਪਣੇ ਇਤਿਹਾਸ ਅਤੇ ਸੰਸਕਾਰਾਂ ਬਾਰੇ ਵੀ ਜਾਣਕਾਰੀ ਪ੍ਰਾਪਤ ਕੀਤੀ। ਇਸ ਯਾਤਰਾ ਵਿੱਚ ਅਧਿਆਪਕਾਂ ਅਤੇ ਸਹਿਯੋਗੀਆਂ ਦੀ ਮਹੱਤਵਪੂਰਨ ਭੂਮਿਕਾ ਰਹੀ, ਜਿਨ੍ਹਾਂ ਵਿੱਚ ਜਸਪਾਲ ਸਿੰਘ, ਮਿਨਾਕਸ਼ੀ ਜੈਨ, ਪੂਜਾ ਬਜਾਜ, ਕਮਲੇਸ਼ ਰਾਣੀ, ਜਸਪ੍ਰੀਤ ਕੌਰ, ਰਣਜੀਤ ਕੌਰ, ਡਿੰਪਲ ਗੁਪਤਾ, ਅਮਨਦੀਪ ਕੌਰ ਅਤੇ ਸੋਨੀਆ ਰਾਣੀ ਸਮੇਤ ਹੋਰ ਸਹਿਯੋਗੀ ਸ਼ਾਮਲ ਸਨ। ਇਸ ਦੇ ਨਾਲ ਹੀ ਕਈ ਸਹਾਇਕਾਂ ਨੇ ਵੀ ਵਿਦਿਆਰਥੀਆਂ ਦੀ ਦੇਖਭਾਲ ਅਤੇ ਪ੍ਰਬੰਧਨ ਵਿੱਚ ਯੋਗਦਾਨ ਪਾਇਆ। ਟੂਰ ਦੌਰਾਨ ਵਿਦਿਆਰਥੀਆਂ ਨੇ ਬੜੀ ਉਤਸੁਕਤਾ ਨਾਲ ਭਾਗ ਲਿਆ ਅਤੇ ਪ੍ਰਯੋਗਾਤਮਕ ਸਿੱਖਿਆ ਦਾ ਅਨੁਭਵ ਕੀਤਾ। ਗੁਰਲੀਨ ਕੌਰ ਵੱਲੋਂ ਟੂਰ ਦੀ ਫੋਟੋਗ੍ਰਾਫੀ ਵੀ ਕੀਤੀ ਗਈ, ਜਿਸ ਨਾਲ ਇਹ ਯਾਦਗਾਰ ਪਲ ਸਦਾ ਲਈ ਸੰਭਾਲੇ ਗਏ।