ਵਿਆਹਾਂ ਦੇ ਸੀਜ਼ਨ ਨਾਲ ਗੁਲਜ਼ਾਰ ਹੋਣਗੇ ਬਾਜ਼ਾਰ: 52 ਲੱਖ ਵਿਆਹਾਂ ਤੋਂ 7.5 ਲੱਖ ਕਰੋੜ ਰੁਪਏ ਦੇ ਕਾਰੋਬਾਰ ਦਾ ਅਨੁਮਾਨ, ਇਕੱਲੇ ਦਿੱਲੀ-ਐੱਨ.ਸੀ.ਆਰ. 'ਚ ਹੋਵੇਗਾ 2.5 ਲੱਖ ਕਰੋੜ ਦਾ ਵਪਾਰ
- ਦੇਸ਼
- (Asia/Kolkata)
ਕਨਫੈਡਰੇਸ਼ਨ ਆਫ ਆਲ ਇੰਡੀਆ ਟਰੇਡਰਜ਼ (ਕੈਟ) ਅਨੁਸਾਰ ਦੇਸ਼ ਭਰ ਵਿੱਚ 21 ਨਵੰਬਰ ਤੋਂ 15 ਦਸੰਬਰ, 2026 ਤੱਕ ਚੱਲਣ ਵਾਲੇ ਵਿਆਹਾਂ ਦੇ ਆਗਾਮੀ ਸੀਜ਼ਨ ਦੌਰਾਨ ਲਗਪਗ 52 ਲੱਖ ਵਿਆਹਾਂ ਤੋਂ 7.5 ਲੱਖ ਕਰੋੜ ਰੁਪਏ ਦਾ ਕਾਰੋਬਾਰ ਹੋਣ ਦੀ ਉਮੀਦ ਹੈ। ਇਸ ਵੱਡੇ ਵਪਾਰਕ ਉਛਾਲ ਨਾਲ ਘਰੇਲੂ ਖਪਤ ਨੂੰ ਭਰਵਾਂ ਹੁਲਾਰਾ ਮਿਲੇਗਾ ਅਤੇ ਲਗਪਗ 1.25 ਕਰੋੜ ਆਰਜ਼ੀ ਤੇ ਮੌਸਮੀ ਰੁਜ਼ਗਾਰ ਦੇ ਮੌਕੇ ਪੈਦਾ ਹੋਣਗੇ। ਕੈਟ ਨੇ ਆਪਣੀ ਤਾਜ਼ਾ ਰਿਪੋਰਟ ਵਿੱਚ ਦੱਸਿਆ ਕਿ ਇਨ੍ਹਾਂ ਅਨੁਮਾਨਾਂ ਵਿੱਚ ਵਿਆਹਾਂ ਦੇ ਸੀਜ਼ਨ ਦੌਰਾਨ ਵਸਤਾਂ ਦੀ ਵਿਕਰੀ ਅਤੇ ਸੇਵਾਵਾਂ ਦੋਵਾਂ ਨੂੰ ਸ਼ਾਮਲ ਕੀਤਾ ਗਿਆ ਹੈ। ਇਹ ਅੰਕੜੇ ਸੰਸਥਾ ਦੇ ਖੋਜ ਵਿੰਗ ‘ਕੈਟ ਰਿਸਰਚ ਐਂਡ ਟਰੇਡ ਡਿਵੈਲਪਮੈਂਟ ਸੁਸਾਇਟੀ’ ਵੱਲੋਂ 25 ਸੂਬਿਆਂ ਦੇ 300 ਤੋਂ ਵੱਧ ਵਪਾਰਕ ਆਗੂਆਂ ਅਤੇ 550 ਵਪਾਰਕ ਐਸੋਸੀਏਸ਼ਨਾਂ ਨਾਲ ਸਲਾਹ-ਮਸ਼ਵਰਾ ਕਰਨ ਉਪਰੰਤ ਤਿਆਰ ਕੀਤੇ ਗਏ ਹਨ। ਰਿਪੋਰਟ ਵਿੱਚ ਅਨੁਮਾਨ ਲਗਾਇਆ ਗਿਆ ਹੈ ਕਿ ਕੁੱਲ ਵਪਾਰ ਵਿੱਚ ਵਸਤਾਂ ਅਤੇ ਪ੍ਰਚੂਨ ਖਰੀਦਦਾਰੀ ਦਾ ਹਿੱਸਾ 4.05 ਲੱਖ ਕਰੋੜ ਰੁਪਏ (ਕੁੱਲ ਕਾਰੋਬਾਰ ਦਾ 54 ਫ਼ੀਸਦੀ) ਹੋਵੇਗਾ, ਜਦਕਿ ਸੇਵਾਵਾਂ ਦਾ ਯੋਗਦਾਨ 3.45 ਲੱਖ ਕਰੋੜ ਰੁਪਏ (46 ਫ਼ੀਸਦੀ) ਰਹੇਗਾ। ਵਸਤਾਂ ਦੀ ਖਰੀਦਦਾਰੀ ਵਿੱਚ ਗਹਿਣਿਆਂ ਅਤੇ ਕੀਮਤੀ ਧਾਤਾਂ ਦਾ ਹਿੱਸਾ ਸਭ ਤੋਂ ਵੱਧ 1.2 ਲੱਖ ਕਰੋੜ ਰੁਪਏ ਰਹਿਣ ਦੀ ਉਮੀਦ ਹੈ। ਇਸ ਤੋਂ ਬਾਅਦ ਕੱਪੜਿਆਂ, ਸਾੜੀਆਂ ਅਤੇ ਗਾਰਮੈਂਟਸ ਦਾ ਨੰਬਰ ਆਉਂਦਾ ਹੈ, ਜਿਨ੍ਹਾਂ ਦਾ ਕਾਰੋਬਾਰ 90,000 ਕਰੋੜ ਰੁਪਏ ਤੱਕ ਪਹੁੰਚ ਸਕਦਾ ਹੈ। ਦੂਜੇ ਪਾਸੇ, ਸੇਵਾਵਾਂ ਦੇ ਖੇਤਰ ਵਿੱਚ ਕੇਟਰਿੰਗ ਅਤੇ ਖਾਣ-ਪੀਣ ਦੀਆਂ ਸੇਵਾਵਾਂ ਤੋਂ 75,000 ਕਰੋੜ ਰੁਪਏ ਦਾ ਕਾਰੋਬਾਰ ਹੋਣ ਦਾ ਅਨੁਮਾਨ ਹੈ, ਜਦਕਿ ਮੈਰਿਜ ਪੈਲੇਸਾਂ, ਬੈਂਕੁਇਟ ਹਾਲਾਂ ਅਤੇ ਹੋਟਲਾਂ ਦਾ ਹਿੱਸਾ 60,000 ਕਰੋੜ ਰੁਪਏ ਰਹਿ ਸਕਦਾ ਹੈ। ਕੈਟ ਨੇ ਦੱਸਿਆ ਕਿ ਇਕੱਲੇ ਦਿੱਲੀ-ਐੱਨ.ਸੀ.ਆਰ. ਵਿੱਚ ਹੀ ਲਗਪਗ ਪੰਜ ਲੱਖ ਵਿਆਹ ਹੋਣ ਦੀ ਉਮੀਦ ਹੈ, ਜਿਸ ਨਾਲ ਅੰਦਾਜ਼ਨ 2.5 ਲੱਖ ਕਰੋੜ ਰੁਪਏ ਦਾ ਕਾਰੋਬਾਰ ਹੋਵੇਗਾ। ਐਸੋਸੀਏਸ਼ਨ ਨੇ ਕਿਹਾ ਕਿ ਵਿਆਹਾਂ ਦਾ ਇਹ ਸੀਜ਼ਨ ਪ੍ਰਚੂਨ, ਨਿਰਮਾਣ, ਪ੍ਰਾਹੁਣਚਾਰੀ (ਹੌਸਪੀਟੈਲਿਟੀ), ਟਰਾਂਸਪੋਰਟ, ਫੂਡ ਪ੍ਰੋਸੈਸਿੰਗ ਅਤੇ ਈਵੈਂਟ ਮੈਨੇਜਮੈਂਟ ਸਮੇਤ ਵੱਖ-ਵੱਖ ਖੇਤਰਾਂ ਦੇ ਕਾਰੋਬਾਰਾਂ ਨੂੰ ਵੱਡਾ ਸਹਾਰਾ ਦੇਵੇਗਾ। ਇਸ ਦੌਰਾਨ ਸਜਾਵਟ ਕਰਨ ਵਾਲਿਆਂ (ਡੈਕੋਰੇਟਰਾਂ), ਕੇਟਰਰਾਂ, ਫੋਟੋਗ੍ਰਾਫਰਾਂ, ਟਰਾਂਸਪੋਰਟਰਾਂ, ਹੋਟਲ ਕਰਮਚਾਰੀਆਂ ਅਤੇ ਹੋਰ ਸੇਵਾ ਪ੍ਰਦਾਤਾਵਾਂ ਲਈ ਲਗਪਗ 1.25 ਕਰੋੜ ਆਰਜ਼ੀ, ਮੌਸਮੀ ਅਤੇ ਪਾਰਟ-ਟਾਈਮ ਰੁਜ਼ਗਾਰ ਦੇ ਮੌਕੇ ਪੈਦਾ ਹੋਣ ਦੀ ਉਮੀਦ ਹੈ। ਕੈਟ ਦੇ ਸਕੱਤਰ ਜਨਰਲ ਪ੍ਰਵੀਨ ਖੰਡੇਲਵਾਲ ਨੇ ਕਿਹਾ ਕਿ ਵਿਆਹਾਂ ਦਾ ਸੀਜ਼ਨ ਸਿਰਫ਼ ਸਮਾਜਿਕ ਅਤੇ ਸੱਭਿਆਚਾਰਕ ਸਮਾਗਮਾਂ ਦੀ ਲੜੀ ਤੋਂ ਕਿਤੇ ਵੱਧ ਹੈ। ਉਨ੍ਹਾਂ ਕਿਹਾ ਕਿ ਇਹ ਇੱਕ ਵੱਡਾ ਆਰਥਿਕ ਵਰਤਾਰਾ ਹੈ ਜੋ ਲੱਖਾਂ ਖਪਤਕਾਰਾਂ, ਵਪਾਰੀਆਂ, ਨਿਰਮਾਤਾਵਾਂ, ਛੋਟੇ ਤੇ ਦਰਮਿਆਨੇ ਉਦਯੋਗਾਂ (MSMEs), ਕਾਰੀਗਰਾਂ ਅਤੇ ਸੇਵਾ ਪ੍ਰਦਾਤਾਵਾਂ ਨੂੰ ਆਪਸ ਵਿੱਚ ਜੋੜਦਾ ਹੈ। ਰਿਪੋਰਟ ਵਿੱਚ ਡਿਜੀਟਲ ਸੱਦਾ ਪੱਤਰਾਂ, ਡਿਜੀਟਲ ਭੁਗਤਾਨਾਂ, ਏ.ਆਈ. (AI) ਆਧਾਰਿਤ ਵਿਆਹਾਂ ਦੀ ਯੋਜਨਾਬੰਦੀ ਅਤੇ ਆਨਲਾਈਨ ਪਲੇਟਫਾਰਮਾਂ ਦੀ ਵਧ ਰਹੀ ਵਰਤੋਂ ਦਾ ਵੀ ਜ਼ਿਕਰ ਕੀਤਾ ਗਿਆ ਹੈ, ਜਿਸ ਨਾਲ ਕਾਰੋਬਾਰ ਦੇ ਨਵੇਂ ਮੌਕੇ ਪੈਦਾ ਹੋ ਰਹੇ ਹਨ। ਕੈਟ ਦੇ ਕੌਮੀ ਪ੍ਰਧਾਨ ਬੀ.ਸੀ. ਭਰਤੀਆ ਨੇ ਕਿਹਾ ਕਿ 52 ਲੱਖ ਵਿਆਹਾਂ ਤੋਂ ਹੋਣ ਵਾਲਾ ਇਹ ਸੰਭਾਵਿਤ ਕਾਰੋਬਾਰ ਭਾਰਤ ਦੇ ਘਰੇਲੂ ਬਾਜ਼ਾਰ ਅਤੇ ਖਪਤਕਾਰਾਂ ਦੀ ਮੰਗ ਦੀ ਮਜ਼ਬੂਤੀ ਨੂੰ ਦਰਸਾਉਂਦਾ ਹੈ। ਐਸੋਸੀਏਸ਼ਨ ਨੇ ਅੱਗੇ ਕਿਹਾ ਕਿ ਜੇਕਰ ਪਰਿਵਾਰ ਭਾਰਤ ਵਿੱਚ ਬਣੀਆਂ ਵਸਤਾਂ ਨੂੰ ਤਰਜੀਹ ਦਿੰਦੇ ਹਨ, ਤਾਂ ਇਹ ਸੀਜ਼ਨ ਸਥਾਨਕ ਨਿਰਮਾਤਾਵਾਂ, ਵਪਾਰੀਆਂ ਅਤੇ ਕਾਰੀਗਰਾਂ ਲਈ ਵੱਡਾ ਸਹਾਰਾ ਬਣ ਸਕਦਾ ਹੈ।
Leave a Reply