ਮਿਆਂਮਾਰ ਦੀ ਧਰਤੀ ‘ਚੋਂ ਨਿਕਲਿਆ ਬੇਮਿਸਾਲ ‘ਲਾਲ ਹੀਰਾ’, ਦੁਨੀਆ ਦਾ ਧਿਆਨ ਖਿੱਚਿਆ

ਮਿਆਂਮਾਰ ਦੀ ਧਰਤੀ ਵਿੱਚੋਂ ਇੱਕ ਬੇਹੱਦ ਕੀਮਤੀ ਅਤੇ ਦੁਰਲੱਭ ਰੂਬੀ ਮਿਲਣ ਦੀ ਖ਼ਬਰ ਸਾਹਮਣੇ ਆਈ ਹੈ, ਜਿਸ ਨੇ ਵਿਸ਼ਵ ਪੱਧਰ ‘ਤੇ ਧਿਆਨ ਆਪਣੇ ਵੱਲ ਖਿੱਚਿਆ ਹੈ। ਬੰਬਾਂ ਅਤੇ ਬਾਰੂਦ ਦੇ ਮਾਹੌਲ ਦਰਮਿਆਨ ਮਿਲੇ ਇਸ ਵਿਸ਼ਾਲ ‘ਲਾਲ ਹੀਰੇ’ ਨੂੰ ਦੇਸ਼ ਵਿੱਚ ਹੁਣ ਤੱਕ ਖੋਜੇ ਗਏ ਸਭ ਤੋਂ ਵੱਡੇ ਰੂਬੀਆਂ ਵਿੱਚੋਂ ਇੱਕ ਮੰਨਿਆ ਜਾ ਰਿਹਾ ਹੈ। ਮਿਆਂਮਾਰ ਦੇ ਸਰਕਾਰੀ ਮੀਡੀਆ ਅਨੁਸਾਰ ਖਣਿਜ ਮਜ਼ਦੂਰਾਂ ਨੇ ਇੱਕ ਵਿਸ਼ਾਲ ਅਤੇ ਉੱਚ ਗੁਣਵੱਤਾ ਵਾਲਾ ਰੂਬੀ ਖੋਜਿਆ ਹੈ। ਭਾਰ ਦੇ ਹਿਸਾਬ ਨਾਲ ਇਸ ਨੂੰ ਦੱਖਣ-ਪੂਰਬੀ ਏਸ਼ੀਆਈ ਦੇਸ਼ ਵਿੱਚ ਮਿਲਿਆ ਦੂਜਾ ਸਭ ਤੋਂ ਵੱਡਾ ਰੂਬੀ ਦੱਸਿਆ ਜਾ ਰਿਹਾ ਹੈ। 11,000 ਕੈਰੇਟ, ਅਰਥਾਤ ਲਗਭਗ 2.2 ਕਿਲੋਗ੍ਰਾਮ ਭਾਰ ਵਾਲਾ ਇਹ ਰੂਬੀ ਉੱਪਰੀ ਮਾਂਡਲੇ ਖੇਤਰ ਦੇ Mogok ਸ਼ਹਿਰ ਦੇ ਨੇੜੇ ਮਿਲਿਆ ਹੈ। ਮੋਗੋਕ ਨੂੰ ਕੀਮਤੀ ਰਤਨਾਂ ਦੀ ਖਦਾਨੀ ਲਈ ਦੁਨੀਆ ਭਰ ਵਿੱਚ ਜਾਣਿਆ ਜਾਂਦਾ ਹੈ। ਹਾਲੀਆ ਸਮੇਂ ਦੌਰਾਨ ਦੇਸ਼ ਦੇ ਗ੍ਰਹਿ ਯੁੱਧ ਕਾਰਨ ਇਸ ਖੇਤਰ ਵਿੱਚ ਭਾਰੀ ਝੜਪਾਂ ਵੀ ਹੋਈਆਂ ਹਨ। ਸਰਕਾਰੀ ਅਖ਼ਬਾਰ Global New Light of Myanmar ਦੀ ਰਿਪੋਰਟ ਮੁਤਾਬਕ ਇਹ ਕੱਚਾ ਰੂਬੀ ਅਪ੍ਰੈਲ ਮਹੀਨੇ ਦੇ ਮੱਧ ਵਿੱਚ, ਰਵਾਇਤੀ ਨਵੇਂ ਸਾਲ ਦੇ ਜਸ਼ਨਾਂ ਤੋਂ ਤੁਰੰਤ ਬਾਅਦ ਖੋਜਿਆ ਗਿਆ ਸੀ। ਹਾਲਾਂਕਿ ਇਸ ਦਾ ਭਾਰ 1996 ਵਿੱਚ ਮਿਲੇ 21,450 ਕੈਰੇਟ ਦੇ ਰੂਬੀ ਨਾਲੋਂ ਲਗਭਗ ਅੱਧਾ ਹੈ, ਪਰ ਮਾਹਿਰਾਂ ਦੇ ਅਨੁਸਾਰ ਇਸ ਦੀ ਗੁਣਵੱਤਾ ਅਤੇ ਰੰਗ ਇਸ ਨੂੰ ਹੋਰ ਵੀ ਜ਼ਿਆਦਾ ਕੀਮਤੀ ਬਣਾਉਂਦੇ ਹਨ। ਰਿਪੋਰਟ ਵਿੱਚ ਦੱਸਿਆ ਗਿਆ ਹੈ ਕਿ ਇਸ ਰੂਬੀ ਦਾ ਰੰਗ ਜਾਮਣੀ-ਲਾਲ ਹੈ, ਜਿਸ ਵਿੱਚ ਪੀਲੇ ਰੰਗ ਦੀ ਹਲਕੀ ਝਲਕ ਵੀ ਨਜ਼ਰ ਆਉਂਦੀ ਹੈ। ਇਸ ਦੇ ਨਾਲ ਹੀ ਰਤਨ ਦੀ ਪਾਰਦਰਸ਼ਤਾ ਮੱਧਮ ਦਰਜੇ ਦੀ ਦੱਸੀ ਗਈ ਹੈ, ਜਦਕਿ ਇਸ ਦੀ ਸਤ੍ਹਾ ਬਹੁਤ ਚਮਕਦਾਰ ਹੈ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਇਸ ਤਰ੍ਹਾਂ ਦੀ ਗੁਣਵੱਤਾ ਵਾਲੇ ਰੂਬੀ ਬਹੁਤ ਹੀ ਘੱਟ ਮਿਲਦੇ ਹਨ, ਜਿਸ ਕਾਰਨ ਇਹ ਖੋਜ ਕਾਫ਼ੀ ਮਹੱਤਵਪੂਰਨ ਮੰਨੀ ਜਾ ਰਹੀ ਹੈ।