ਉੱਚ ਜੀਵਨ ਲਾਗਤ ਤੇ ਨੀਤੀਆਂ ਦਾ ਅਸਰ: ਅਮਰੀਕੀ ਯੂਰਪ ਵੱਲ ਕਿਉਂ ਮੁੜ ਰਹੇ ਹਨ?

ਪਿਛਲੇ ਕੁਝ ਸਮੇਂ ਦੌਰਾਨ ਸੰਯੁਕਤ ਰਾਜ ਅਮਰੀਕਾ ਵਿੱਚ ਵੱਡੇ ਪੱਧਰ ‘ਤੇ ਜਨਸੰਖਿਆ ਦੇ ਰੁਝਾਨਾਂ ਵਿੱਚ ਤਬਦੀਲੀ ਦੇਖਣ ਨੂੰ ਮਿਲ ਰਹੀ ਹੈ। ਇੱਕ ਫਾਈਨੈਂਸ਼ੀਅਲ ਡੇਲੀ ਦੀ ਰਿਪੋਰਟ ਮੁਤਾਬਕ, ਵੱਡੀ ਗਿਣਤੀ ਵਿੱਚ ਅਮਰੀਕੀ ਆਪਣੇ ਦੇਸ਼ ਨੂੰ ਛੱਡ ਕੇ ਹੋਰ ਦੇਸ਼ਾਂ ਵੱਲ ਪਰਵਾਸ ਕਰ ਰਹੇ ਹਨ। 1935 ਦੀ ਮਹਾਂਮੰਦੀ ਤੋਂ ਬਾਅਦ ਇਹ ਪਹਿਲੀ ਵਾਰ ਹੋਇਆ ਹੈ ਜਦੋਂ ਇਸ ਤਰ੍ਹਾਂ ਦਾ ਰੁਝਾਨ ਸਾਹਮਣੇ ਆਇਆ ਹੈ। ਬਰੂਕਿੰਗਜ਼ ਇੰਸਟੀਚਿਊਸ਼ਨ ਦੇ ਅਨੁਮਾਨ ਅਨੁਸਾਰ ਪਿਛਲੇ ਸਾਲ ਲਗਭਗ 1.5 ਲੱਖ ਲੋਕਾਂ ਨੇ ਅਮਰੀਕਾ ਛੱਡਿਆ ਸੀ ਅਤੇ 2026 ਵਿੱਚ ਇਹ ਗਿਣਤੀ ਹੋਰ ਵੱਧ ਸਕਦੀ ਹੈ। ਕਈ ਵਿਸ਼ੇਸ਼ਗਿਆਣ ਇਸ ਰੁਝਾਨ ਨੂੰ ਡੋਨਾਲਡ ਟਰੰਪ ਦੇ ਸੱਤਾ ਵਿੱਚ ਆਉਣ ਨਾਲ ਜੋੜ ਰਹੇ ਹਨ। ਵਾਲ ਸਟਰੀਟ ਜਰਨਲ ਦੀ ਰਿਪੋਰਟ ਅਨੁਸਾਰ 2025 ਵਿੱਚ ਅਮਰੀਕਾ ਵਿੱਚ ਵਸਣ ਵਾਲੇ ਵਿਦੇਸ਼ੀਆਂ ਦੀ ਗਿਣਤੀ ਘੱਟ ਕੇ 26-27 ਲੱਖ ਰਹਿ ਗਈ, ਜਦਕਿ 2023 ਵਿੱਚ ਇਹ ਲਗਭਗ 60 ਲੱਖ ਸੀ। ਇਸ ਅਖਬਾਰ ਨੇ 15 ਦੇਸ਼ਾਂ ਦੇ ਅੰਕੜਿਆਂ ਦੇ ਵਿਸ਼ਲੇਸ਼ਣ ਤੋਂ ਪਾਇਆ ਕਿ ਘੱਟੋ-ਘੱਟ 1.8 ਲੱਖ ਅਮਰੀਕੀ ਇਨ੍ਹਾਂ ਦੇਸ਼ਾਂ ਵੱਲ ਪਰਵਾਸ ਕਰ ਗਏ ਹਨ, ਜੋ ਕਿ ਪੂਰੇ ਡਾਟਾ ਆਉਣ ‘ਤੇ ਹੋਰ ਵੱਧ ਸਕਦੀ ਹੈ। ਰਿਪੋਰਟ ਮੁਤਾਬਕ ਮਹਾਂਮਾਰੀ ਤੋਂ ਬਾਅਦ ਪੁਰਤਗਾਲ ਵਿੱਚ ਅਮਰੀਕੀ ਨਿਵਾਸੀਆਂ ਦੀ ਗਿਣਤੀ 500 ਪ੍ਰਤੀਸ਼ਤ ਤੋਂ ਵੱਧ ਵਧੀ ਹੈ, ਜਦਕਿ 2024 ਵਿੱਚ ਹੀ 36 ਪ੍ਰਤੀਸ਼ਤ ਦਾ ਵਾਧਾ ਦਰਜ ਕੀਤਾ ਗਿਆ। ਇਸੇ ਤਰ੍ਹਾਂ 2025 ਵਿੱਚ 10 ਹਜ਼ਾਰ ਤੋਂ ਵੱਧ ਅਮਰੀਕੀ ਆਇਰਲੈਂਡ ਪਹੁੰਚੇ, ਜੋ ਪਿਛਲੇ ਸਾਲ ਨਾਲੋਂ ਲਗਭਗ ਦੂਣੇ ਹਨ। ਜਰਮਨੀ ਦੇ ਮਾਮਲੇ ਵਿੱਚ ਵੀ ਪਿਛਲੇ ਸਾਲ ਅਮਰੀਕਾ ਨਾਲੋਂ ਵੱਧ ਲੋਕ ਅਮਰੀਕਾ ਤੋਂ ਜਰਮਨੀ ਗਏ। ਰੀਲੋਕੇਸ਼ਨ ਕੰਪਨੀਆਂ ਵੀ ਇਸ ਰੁਝਾਨ ਦੀ ਪੁਸ਼ਟੀ ਕਰ ਰਹੀਆਂ ਹਨ। ਐਕਸਪੈਟਸੀ ਦੀ ਸੰਸਥਾਪਕ ਜੇਨ ਬਾਰਨੇਟ ਨੇ ਕਿਹਾ ਕਿ ਪਹਿਲਾਂ ਵਿਦੇਸ਼ ਜਾਣ ਵਾਲੇ ਅਮਰੀਕੀ ਜ਼ਿਆਦਾਤਰ ਉੱਚ ਯੋਗਤਾ ਵਾਲੇ ਹੁੰਦੇ ਸਨ, ਪਰ ਹੁਣ ਆਮ ਲੋਕ ਵੀ ਇਸ ਰਾਹ ‘ਤੇ ਹਨ। ਉਸਦੇ ਮੁਤਾਬਕ, ਯੂਰਪ ਵਿੱਚ ਜੀਵਨ ਦੀ ਗੁਣਵੱਤਾ ਅਮਰੀਕਾ ਨਾਲੋਂ ਬਿਹਤਰ ਮੰਨੀ ਜਾ ਰਹੀ ਹੈ, ਭਾਵੇਂ ਤਨਖਾਹਾਂ ਉੱਥੇ ਘੱਟ ਹੋਣ। ਕੁਝ ਮਾਹਰ ਇਸ ਰੁਝਾਨ ਨੂੰ “ਡੋਨਾਲਡ ਡੈਸ਼” ਨਾਮ ਦੇ ਰਹੇ ਹਨ, ਜੋ ਕਿ ਡੋਨਾਲਡ ਟਰੰਪ ਦੇ ਦੂਜੇ ਕਾਰਜਕਾਲ ਦੌਰਾਨ ਵਧੇ ਪਰਵਾਸ ਨਾਲ ਜੋੜਿਆ ਜਾ ਰਿਹਾ ਹੈ। ਹਾਲਾਂਕਿ, ਮਾਹਰ ਇਹ ਵੀ ਮੰਨਦੇ ਹਨ ਕਿ ਰਿਮੋਟ ਵਰਕ, ਵਧ ਰਹੀਆਂ ਰਹਿਣ-ਸਹਿਣ ਦੀਆਂ ਲਾਗਤਾਂ ਅਤੇ ਜੀਵਨ ਸ਼ੈਲੀ ਦੇ ਕਾਰਨ ਵੀ ਇਹ ਰੁਝਾਨ ਪਹਿਲਾਂ ਤੋਂ ਹੀ ਮੌਜੂਦ ਸੀ। ਇਸ ਮਾਮਲੇ ‘ਤੇ ਵ੍ਹਾਈਟ ਹਾਊਸ ਦੇ ਬੁਲਾਰੇ ਨੇ ਕਿਹਾ ਕਿ ਅਮਰੀਕੀ ਅਰਥਵਿਵਸਥਾ ਹੋਰ ਵਿਕਸਤ ਦੇਸ਼ਾਂ ਨਾਲੋਂ ਮਜ਼ਬੂਤ ਹੈ ਅਤੇ ਸਰਕਾਰ ਗੈਰ-ਕਾਨੂੰਨੀ ਪ੍ਰਵਾਸੀਆਂ ‘ਤੇ ਕਾਰਵਾਈ ਕਰ ਰਹੀ ਹੈ। ਅਮਰੀਕੀ ਗ੍ਰਹਿ ਸੁਰੱਖਿਆ ਵਿਭਾਗ ਦੇ ਅੰਕੜਿਆਂ ਅਨੁਸਾਰ ਪਿਛਲੇ ਸਾਲ 6.75 ਲੱਖ ਲੋਕਾਂ ਨੂੰ ਦੇਸ਼ ਨਿਕਾਲਾ ਦਿੱਤਾ ਗਿਆ ਅਤੇ 22 ਲੱਖ ਨੇ ਖੁਦ ਦੇਸ਼ ਛੱਡਿਆ। ਇਸ ਦੇ ਨਾਲ ਹੀ ਅਮਰੀਕਾ ਵਿੱਚ ਆਉਣ ਵਾਲੇ ਵਿਦੇਸ਼ੀ ਵਿਦਿਆਰਥੀਆਂ ਦੀ ਗਿਣਤੀ ਵਿੱਚ ਵੀ 17 ਪ੍ਰਤੀਸ਼ਤ ਦੀ ਗਿਰਾਵਟ ਦਰਜ ਕੀਤੀ ਗਈ ਹੈ। ਇਸਦੇ ਉਲਟ, ਅਮਰੀਕੀ ਵਿਦਿਆਰਥੀਆਂ ਦਾ ਯੂਰਪੀ ਯੂਨੀਵਰਸਿਟੀਆਂ ਵੱਲ ਰੁਝਾਨ ਵਧ ਰਿਹਾ ਹੈ। ਮਾਰਚ 2025 ਤੱਕ 6,600 ਅਮਰੀਕੀਆਂ ਨੇ ਬ੍ਰਿਟਿਸ਼ ਨਾਗਰਿਕਤਾ ਲਈ ਅਰਜ਼ੀ ਦਿੱਤੀ, ਜਦਕਿ ਆਇਰਲੈਂਡ ਵਿੱਚ ਪਾਸਪੋਰਟ ਅਰਜ਼ੀਆਂ 2024 ਦੇ 31,825 ਤੋਂ ਵੱਧ ਕੇ 2025 ਵਿੱਚ 40,000 ਤੋਂ ਉੱਪਰ ਪਹੁੰਚ ਗਈਆਂ। ਰਿਪੋਰਟਾਂ ਅਨੁਸਾਰ ਅਮਰੀਕੀ ਨਾਗਰਿਕਤਾ ਤਿਆਗਣ ਵਾਲਿਆਂ ਦੀ ਗਿਣਤੀ ਵਿੱਚ ਵੀ ਵਾਧਾ ਹੋ ਰਿਹਾ ਹੈ। ਇਮੀਗ੍ਰੇਸ਼ਨ ਫਰਮਾਂ ਮੁਤਾਬਕ 2024 ਵਿੱਚ ਅਜਿਹੀਆਂ ਬੇਨਤੀਆਂ ਵਿੱਚ 48 ਪ੍ਰਤੀਸ਼ਤ ਦਾ ਵਾਧਾ ਦਰਜ ਕੀਤਾ ਗਿਆ ਹੈ ਅਤੇ 2025 ਵਿੱਚ ਇਹ ਰੁਝਾਨ ਹੋਰ ਵੱਧ ਸਕਦਾ ਹੈ। ਸਰਕਾਰੀ ਦਫ਼ਤਰਾਂ ਵਿੱਚ ਇਸ ਲਈ ਇੱਕ ਮਹੀਨੇ ਤੋਂ ਵੱਧ ਦਾ ਬੈਕਲਾਗ ਬਣਿਆ ਹੋਇਆ ਹੈ। ਇਸ ਤਰ੍ਹਾਂ ਦਾ ਰੁਝਾਨ ਇਤਿਹਾਸ ਵਿੱਚ ਪਹਿਲਾਂ 1935 ਦੌਰਾਨ ਵੀ ਦੇਖਿਆ ਗਿਆ ਸੀ, ਜਦੋਂ ਮਹਾਂਮੰਦੀ ਕਾਰਨ ਵੱਡੀ ਗਿਣਤੀ ਵਿੱਚ ਅਮਰੀਕੀ ਰੋਜ਼ਗਾਰ ਦੀ ਭਾਲ ਵਿੱਚ ਹੋਰ ਦੇਸ਼ਾਂ ਵੱਲ ਗਏ ਸਨ। ਮੌਜੂਦਾ ਹਾਲਾਤ ਇਸ ਇਤਿਹਾਸਕ ਪ੍ਰਵਿਰਤੀ ਦੀ ਦੁਹਰਾਈ ਵਾਂਗ ਦਿਖਾਈ ਦੇ ਰਹੇ ਹਨ।