WhatsApp ਯੂਜ਼ਰਾਂ ਲਈ ਖੁਸ਼ਖਬਰੀ, ਹੁਣ ਨੰਬਰ ਲੁਕਾ ਕੇ ਵੀ ਕਰ ਸਕੋਗੇ ਗੱਲਬਾਤ

ਮੈਟਾ ਦੀ ਮੈਸੇਜਿੰਗ ਐਪ WhatsApp ਆਪਣੇ ਉਪਭੋਗਤਾਵਾਂ ਦੀ ਗੋਪਨੀਯਤਾ ਨੂੰ ਹੋਰ ਮਜ਼ਬੂਤ ਬਣਾਉਣ ਲਈ ਇੱਕ ਨਵਾਂ ਫੀਚਰ ਲੈ ਕੇ ਆ ਰਹੀ ਹੈ। ਕੰਪਨੀ ਨੇ ‘ਯੂਜ਼ਰਨੇਮ’ (Username) ਫੀਚਰ ਦਾ ਐਲਾਨ ਕੀਤਾ ਹੈ, ਜਿਸ ਦੀ ਮਦਦ ਨਾਲ ਹੁਣ ਕਿਸੇ ਅਣਜਾਣ ਵਿਅਕਤੀ ਨਾਲ ਗੱਲਬਾਤ ਕਰਨ ਲਈ ਆਪਣਾ ਨਿੱਜੀ ਮੋਬਾਈਲ ਨੰਬਰ ਸਾਂਝਾ ਕਰਨ ਦੀ ਲੋੜ ਨਹੀਂ ਪਵੇਗੀ। ਨਵੇਂ ਫੀਚਰ ਤਹਿਤ ਉਪਭੋਗਤਾ ਆਪਣੇ ਫੋਨ ਨੰਬਰ ਦੀ ਥਾਂ ਯੂਜ਼ਰਨੇਮ ਰਾਹੀਂ ਇਕ-ਦੂਜੇ ਨਾਲ ਸੰਪਰਕ ਕਰ ਸਕਣਗੇ। ਇਸ ਨਾਲ ਮੋਬਾਈਲ ਨੰਬਰ ਜਨਤਕ ਨਹੀਂ ਹੋਵੇਗਾ ਅਤੇ ਉਪਭੋਗਤਾਵਾਂ ਦੀ ਪ੍ਰਾਈਵੇਸੀ ਪਹਿਲਾਂ ਨਾਲੋਂ ਹੋਰ ਸੁਰੱਖਿਅਤ ਰਹੇਗੀ। ਕੰਪਨੀ ਨੇ ਦੱਸਿਆ ਹੈ ਕਿ ਦੁਨੀਆ ਭਰ ਦੇ ਉਪਭੋਗਤਾ ਇਸ ਸਾਲ ਦੇ ਅੰਤ ਵਿੱਚ ਫੀਚਰ ਜਾਰੀ ਹੋਣ ਤੋਂ ਪਹਿਲਾਂ ਆਪਣਾ ਮਨਪਸੰਦ ਯੂਜ਼ਰਨੇਮ ਰਿਜ਼ਰਵ ਕਰ ਸਕਣਗੇ। ਕੰਪਨੀ ਦਾ ਕਹਿਣਾ ਹੈ ਕਿ ਕਈ ਵਾਰ ਕਿਸੇ ਨਵੇਂ ਕਲਾਸਮੇਟ, ਗੁਆਂਢੀ ਜਾਂ ਕਿਸੇ ਸਮਾਗਮ ਵਿੱਚ ਮਿਲੇ ਵਿਅਕਤੀ ਨਾਲ ਸੰਪਰਕ ਬਣਾਉਣ ਲਈ ਆਪਣਾ ਨਿੱਜੀ ਨੰਬਰ ਸਾਂਝਾ ਕਰਨਾ ਅਸਹਿਜ ਮਹਿਸੂਸ ਹੁੰਦਾ ਹੈ। ਇਸੇ ਤਰ੍ਹਾਂ ਸਕੂਲ, ਰਿਹਾਇਸ਼ੀ ਇਲਾਕਿਆਂ ਜਾਂ ਹੋਰ ਗਰੁੱਪ ਚੈਟਾਂ ਵਿੱਚ ਵੀ ਮੋਬਾਈਲ ਨੰਬਰ ਅਣਜਾਣ ਲੋਕਾਂ ਨੂੰ ਦਿਖਾਈ ਦਿੰਦਾ ਹੈ। ਨਵਾਂ ਫੀਚਰ ਇਸ ਸਮੱਸਿਆ ਦਾ ਹੱਲ ਪੇਸ਼ ਕਰੇਗਾ, ਕਿਉਂਕਿ ਹੁਣ ਲੋਕ ਸਿਰਫ਼ ਯੂਜ਼ਰਨੇਮ ਰਾਹੀਂ ਹੀ ਸੰਪਰਕ ਕਰ ਸਕਣਗੇ। WhatsApp ਨੇ ਇਹ ਵੀ ਸਪੱਸ਼ਟ ਕੀਤਾ ਹੈ ਕਿ ਕੋਈ ਵੀ ਵਿਅਕਤੀ ਤੁਹਾਨੂੰ ਬਿਨਾਂ ਜਾਣਕਾਰੀ ਦੇ ਨਹੀਂ ਲੱਭ ਸਕੇਗਾ। ਚੈਟ ਸ਼ੁਰੂ ਕਰਨ ਲਈ ਉਸ ਨੂੰ ਤੁਹਾਡਾ ਸਹੀ ਅਤੇ ਪੂਰਾ ਯੂਜ਼ਰਨੇਮ ਦਰਜ ਕਰਨਾ ਲਾਜ਼ਮੀ ਹੋਵੇਗਾ। ਇਸ ਨਾਲ ਉਹਨਾਂ ਲੋਕਾਂ ਤੋਂ ਤੁਹਾਡਾ ਮੋਬਾਈਲ ਨੰਬਰ ਪੂਰੀ ਤਰ੍ਹਾਂ ਲੁਕਿਆ ਰਹੇਗਾ, ਜਿਨ੍ਹਾਂ ਨਾਲ ਤੁਸੀਂ ਆਪਣੀ ਜਾਣਕਾਰੀ ਸਾਂਝੀ ਨਹੀਂ ਕਰਨਾ ਚਾਹੁੰਦੇ। ਕੰਪਨੀ ਅਨੁਸਾਰ ਯੂਜ਼ਰਨੇਮ 3 ਤੋਂ 35 ਅੱਖਰਾਂ ਤੱਕ ਦਾ ਹੋ ਸਕੇਗਾ। ਇਸ ਵਿੱਚ ਸਿਰਫ਼ ਅੱਖਰ, ਅੰਕ ਅਤੇ ਅੰਡਰਸਕੋਰ (_) ਦੀ ਵਰਤੋਂ ਕੀਤੀ ਜਾ ਸਕੇਗੀ। WhatsApp ਨੇ ਉਪਭੋਗਤਾਵਾਂ ਨੂੰ ਸਲਾਹ ਦਿੱਤੀ ਹੈ ਕਿ ਉਹ ਆਪਣੀਆਂ ਪ੍ਰਾਈਵੇਸੀ ਸੈਟਿੰਗਾਂ ਨੂੰ ਹਮੇਸ਼ਾ ਅਪਡੇਟ ਰੱਖਣ ਅਤੇ ਪ੍ਰੋਫਾਈਲ ਕੰਟਰੋਲ ਤੇ ਕਾਂਟੈਕਟ ਸਿੰਕ ਵਰਗੀਆਂ ਵਿਸ਼ੇਸ਼ਤਾਵਾਂ ਨੂੰ ਲੋੜ ਪੈਣ ‘ਤੇ ਹੀ ਐਕਟੀਵੇਟ ਕਰਨ। ਕੰਪਨੀ ਨੇ 29 ਜੂਨ ਨੂੰ ਇਸ ਨਵੇਂ ਫੀਚਰ ਦਾ ਐਲਾਨ ਕੀਤਾ ਸੀ ਅਤੇ ਇਹ ਇਸ ਸਾਲ ਦੇ ਅੰਤ ਤੱਕ ਸਾਰੇ ਉਪਭੋਗਤਾਵਾਂ ਲਈ ਉਪਲਬਧ ਕਰਵਾਇਆ ਜਾਵੇਗਾ।