ਬਿਆਸ–ਸਤਲੁਜ ਲਿੰਕ ਪ੍ਰੋਜੈਕਟ ਵਿੱਚ ਵੱਡੀਆਂ ਖਾਮੀਆਂ ਬੇਨਕਾਬ

ਪੰਜਾਬ ਸਰਕਾਰ ਨੇ ਕਿਹਾ ਹੈ ਕਿ ਮਈ-ਸਤੰਬਰ 2025 ਦੀ ਮਿਆਦ ਦੌਰਾਨ ਦੇਹਰ ਪਾਵਰ ਹਾਊਸ ਦੇ ਛੇ ਵਿੱਚੋਂ ਤਿੰਨ ਜਨਰੇਟਿੰਗ ਯੂਨਿਟ ਗੈਰ-ਕਾਰਜਸ਼ੀਲ ਰਹੇ, ਜਿਸ ਨਾਲ ਰੋਜ਼ਾਨਾ ਬਿਜਲੀ ਉਤਪਾਦਨ ਸਮਰੱਥਾ ਵਿੱਚ ਭਾਰੀ ਗਿਰਾਵਟ ਦਰਜ ਕੀਤੀ ਗਈ। ਪੰਜਾਬ ਸਰਕਾਰ ਨੇ ਭਾਖੜਾ ਬਿਆਸ ਪ੍ਰਬੰਧਨ ਬੋਰਡ (ਬੀਬੀਐਮਬੀ) ਵਲੋਂ ਬਿਆਸ-ਸਤਲੁਜ ਲਿੰਕ (ਬੀਐਸਐਲ) ਪ੍ਰਾਜੈਕਟ ਅਤੇ 990 ਮੈਗਾਵਾਟ ਸਮਰੱਥਾ ਵਾਲੇ ਦੇਹਰ ਪਾਵਰ ਹਾਊਸ ਦੇ ਪ੍ਰਣਾਲੀਗਤ ਕੁਪ੍ਰਬੰਧਨ ’ਤੇ ਚਿੰਤਾ ਜ਼ਾਹਰ ਕੀਤੀ ਹੈ।

ਪੰਜਾਬ ਸਰਕਾਰ ਨੇ ਦੋਸ਼ ਲਗਾਇਆ ਹੈ ਕਿ ਬਿਜਲੀ ਉਤਪਾਦਨ ਵਿੱਚ ਕਮੀ ਕਾਰਨ ਭਾਈਵਾਲ ਰਾਜਾਂ ਨੂੰ 227 ਕਰੋੜ ਰੁਪਏ ਦਾ ਭਾਰੀ ਵਿੱਤੀ ਨੁਕਸਾਨ ਹੋਇਆ ਹੈ ਅਤੇ ਬੀਐਸਐਲ ਪ੍ਰਾਜੈਕਟ ਦੇ ਸੰਚਾਲਨ ਵਿਚ ਅਸਫਲਤਾਵਾਂ ਅਤੇ ਨਾਕਾਫ਼ੀ ਰੱਖ-ਰਖਾਅ ਕਾਰਨ ਭਾਈਵਾਲ ਰਾਜਾਂ ਲਈ ਪਾਣੀ ਸੁਰੱਖਿਆ ਲਈ ਸੰਭਾਵੀ ਖ਼ਤਰਾ ਖੜ੍ਹਾ ਹੋ ਗਿਆ ਹੈ।