ਅਮਰੀਕਾ–ਇਜ਼ਰਾਈਲ–ਈਰਾਨ ਤਣਾਅ ਵਿਚਕਾਰ ਇਰਾਕ ਵਿੱਚ KC-135 ਜਹਾਜ਼ ਹਾਦਸਾਗ੍ਰਸਤ

ਅਮਰੀਕਾ, ਇਜ਼ਰਾਈਲ ਅਤੇ ਈਰਾਨ ਵਿਚਕਾਰ ਚੱਲ ਰਹੇ ਟਕਰਾਅ ਦੇ 14ਵੇਂ ਦਿਨ ਇਰਾਕ ਵਿੱਚ ਇੱਕ ਅਮਰੀਕੀ ਫੌਜੀ ਜਹਾਜ਼ ਹਾਦਸਾਗ੍ਰਸਤ ਹੋਣ ਦੀ ਖਬਰ ਸਾਹਮਣੇ ਆਈ ਹੈ। ਰਿਪੋਰਟਾਂ ਮੁਤਾਬਕ ਅਮਰੀਕੀ ਫੌਜ ਦਾ KC-135 ਜਹਾਜ਼ ਪੱਛਮੀ ਇਰਾਕ ਵਿੱਚ ਕ੍ਰੈਸ਼ ਹੋ ਗਿਆ ਹੈ। ਇਰਾਕ ਦੇ ਇੱਕ ਸ਼ੀਆ ਬਾਗ਼ੀ ਗੁੱਟ ਨੇ ਦਾਅਵਾ ਕੀਤਾ ਹੈ ਕਿ ਉਸਦੇ ਲੜਾਕਿਆਂ ਨੇ ਇਸ ਜਹਾਜ਼ ਨੂੰ ਨਿਸ਼ਾਨਾ ਬਣਾਇਆ ਸੀ। ਇਸ ਤੋਂ ਪਹਿਲਾਂ 2 ਮਾਰਚ ਨੂੰ ਕੁਵੈਤ ਵਿੱਚ ਵੀ ਤਿੰਨ ਅਮਰੀਕੀ ਜਹਾਜ਼ ਦੋਸਤਾਨਾ ਫਾਇਰ ਕਾਰਨ ਹਾਦਸੇ ਦਾ ਸ਼ਿਕਾਰ ਹੋ ਗਏ ਸਨ। ਇਰਾਕ ਵਿੱਚ ਸਰਗਰਮ ਇਸਲਾਮਿਕ ਰੈਜ਼ਿਸਟੈਂਸ ਗਰੁੱਪ ਨੇ ਕਿਹਾ ਹੈ ਕਿ ਉਸਦੇ ਲੜਾਕਿਆਂ ਨੇ ਪੱਛਮੀ ਇਰਾਕ ਵਿੱਚ ਆਪਣੀ ਹਵਾਈ ਰੱਖਿਆ ਪ੍ਰਣਾਲੀ ਦੀ ਵਰਤੋਂ ਕਰਦੇ ਹੋਏ ਅਮਰੀਕੀ ਜਹਾਜ਼ ‘ਤੇ ਹਮਲਾ ਕੀਤਾ, ਜਿਸ ਕਾਰਨ ਇਹ ਹਾਦਸਾਗ੍ਰਸਤ ਹੋ ਗਿਆ। ਇਹ ਗਠਜੋੜ ਕਈ ਈਰਾਨ-ਸਮਰਥਿਤ ਸਮੂਹਾਂ ਨੂੰ ਮਿਲਾ ਕੇ ਬਣਿਆ ਹੈ। ਹਾਲਾਂਕਿ ਅਮਰੀਕੀ ਫੌਜ ਨੇ ਬਾਗ਼ੀ ਗਰੁੱਪ ਦੇ ਇਸ ਦਾਅਵੇ ਨੂੰ ਨਕਾਰ ਦਿੱਤਾ ਹੈ। ਯੂਐਸ ਸੈਂਟਰਲ ਕਮਾਂਡ (ਸੈਂਟਕਾਮ) ਦੇ ਮੁਤਾਬਕ ਦੋ ਅਮਰੀਕੀ ਜਹਾਜ਼ਾਂ ਨਾਲ ਜੁੜੀ ਇੱਕ ਘਟਨਾ ਵਾਪਰੀ ਹੈ। ਇਸ ਵਿੱਚੋਂ ਇੱਕ ਜਹਾਜ਼ ਪੱਛਮੀ ਇਰਾਕ ਵਿੱਚ ਹਾਦਸਾਗ੍ਰਸਤ ਹੋ ਗਿਆ, ਜਦਕਿ ਦੂਜਾ ਜਹਾਜ਼ ਸੁਰੱਖਿਅਤ ਤੌਰ ‘ਤੇ ਇਜ਼ਰਾਈਲ ਵਿੱਚ ਉਤਰ ਗਿਆ। ਅਮਰੀਕੀ ਫੌਜ ਦਾ ਕਹਿਣਾ ਹੈ ਕਿ ਜਹਾਜ਼ ਕਿਸੇ ਹਮਲੇ ਜਾਂ ਗੋਲੀਬਾਰੀ ਕਾਰਨ ਨਹੀਂ ਡਿੱਗਿਆ। ਫੌਜ ਦੇ ਅਨੁਸਾਰ ਇਹ ਘਟਨਾ ਉਸ ਖੇਤਰ ਵਿੱਚ ਵਾਪਰੀ ਜਿਸਨੂੰ ਦੋਸਤਾਨਾ ਹਵਾਈ ਖੇਤਰ ਮੰਨਿਆ ਜਾਂਦਾ ਹੈ।