ਬਲੋਚਿਸਤਾਨ ਵਿੱਚ ਮੀਂਹ ਤੇ ਹੜ੍ਹਾਂ ਦਾ ਕਹਿਰ: 7 ਦੀ ਮੌਤ, 4 ਜ਼ਖਮੀ

Pakistan ਦੇ Balochistan ਸੂਬੇ ਵਿੱਚ ਭਾਰੀ ਮੀਂਹ ਅਤੇ ਅਚਾਨਕ ਆਏ ਹੜ੍ਹਾਂ ਕਾਰਨ ਵੱਡੀ ਤਬਾਹੀ ਹੋਈ ਹੈ, ਜਿਸ ਵਿੱਚ ਘੱਟੋ-ਘੱਟ ਸੱਤ ਲੋਕਾਂ ਦੀ ਮੌਤ ਹੋ ਗਈ ਹੈ ਅਤੇ ਚਾਰ ਹੋਰ ਜ਼ਖਮੀ ਹੋਏ ਹਨ। ਸਥਾਨਕ ਮੀਡੀਆ ਨੇ ਸ਼ੁੱਕਰਵਾਰ ਨੂੰ ਇਹ ਜਾਣਕਾਰੀ ਦਿੱਤੀ। ਹੜ੍ਹਾਂ ਦਾ ਅਸਰ ਕੱਛੀ, ਨਸੀਰਾਬਾਦ, ਝਾਲ ਮਾਗਸੀ, ਡੇਰਾ ਬੁਗਤੀ, ਸਿਬੀ, ਹਰਨਾਈ, ਕੋਹਲੂ, ਤੁਰਬਤ, ਜਾਫਰਾਬਾਦ, ਲੋਰਾਲਾਈ ਅਤੇ ਬੋਲਾਨ ਸਮੇਤ ਕਈ ਜ਼ਿਲ੍ਹਿਆਂ ‘ਚ ਦੇਖਿਆ ਗਿਆ ਹੈ, ਜਿੱਥੇ ਵੱਡੇ ਪੱਧਰ ‘ਤੇ ਨੁਕਸਾਨ ਹੋਇਆ ਹੈ। ਪ੍ਰੋਵਿੰਸ਼ੀਅਲ ਡਿਜਾਸਟਰ ਮੈਨੇਜਮੈਂਟ ਅਥਾਰਟੀ (PDMA) ਦੇ ਅਨੁਸਾਰ, 100 ਤੋਂ ਵੱਧ ਘਰ ਤਬਾਹ ਹੋ ਚੁੱਕੇ ਹਨ, 50 ਤੋਂ ਵੱਧ ਪਸ਼ੂ ਮਾਰੇ ਗਏ ਹਨ ਅਤੇ ਲਗਭਗ 400 ਏਕੜ ਖੇਤੀਬਾੜੀ ਜ਼ਮੀਨ ਪਾਣੀ ਹੇਠ ਆ ਗਈ ਹੈ। ਰਿਪੋਰਟਾਂ ਮੁਤਾਬਕ, ਹਰਨਾਈ ਅਤੇ ਕਿਲਾ ਅਬਦੁੱਲਾ ਵਿੱਚ ਕਰੀਬ 100 ਘਰਾਂ ਨੂੰ ਨੁਕਸਾਨ ਪਹੁੰਚਿਆ ਹੈ, ਜਦਕਿ ਝਾਲ ਮਾਗਸੀ ਵਿੱਚ ਗੰਦਾਵਾਹ-ਨੋਟਲ ਸੜਕ ਹੜ੍ਹਾਂ ਕਾਰਨ ਬੰਦ ਹੋ ਗਈ ਹੈ। ਮੌਤਾਂ ਦੇ ਕਾਰਣ ਵੱਖ-ਵੱਖ ਘਟਨਾਵਾਂ ਨਾਲ ਜੁੜੇ ਹਨ। ਲੋਰਾਲਾਈ ਅਤੇ ਕੱਛੀ ਵਿੱਚ ਬਿਜਲੀ ਡਿੱਗਣ ਕਾਰਨ ਦੋ ਲੋਕਾਂ ਦੀ ਮੌਤ ਹੋਈ, ਕੋਹਲੂ ਵਿੱਚ ਇੱਕ ਵਿਅਕਤੀ ਦੀ ਛੱਤ ਡਿੱਗਣ ਨਾਲ ਮੌਤ ਹੋ ਗਈ। ਇਸ ਤੋਂ ਇਲਾਵਾ, ਲੋਰਾਲਾਈ ਵਿੱਚ ਕੰਧ ਡਿੱਗਣ ਨਾਲ ਇੱਕ ਹੋਰ ਵਿਅਕਤੀ ਦੀ ਜਾਨ ਗਈ, ਜਾਫਰਾਬਾਦ ਵਿੱਚ ਇੱਕ ਬੱਚਾ ਡੁੱਬਣ ਕਾਰਨ ਮਰ ਗਿਆ ਅਤੇ ਕੇਚ ਵਿੱਚ ਦੋ ਲੋਕ ਪਾਣੀ ਵਿੱਚ ਵਹਿ ਗਏ। ਭਾਰੀ ਬਾਰਿਸ਼ ਕਾਰਨ ਮੁੱਖ ਸੜਕਾਂ ਨੂੰ ਵੀ ਨੁਕਸਾਨ ਪਹੁੰਚਿਆ ਹੈ। ਹਰਨਾਈ-ਕੁਇਟਾ ਅਤੇ ਕੱਛੀ-ਸੰਜਾਵੀ ਰਾਸ਼ਟਰੀ ਰਾਜਮਾਰਗਾਂ ਦੇ ਕੁਝ ਹਿੱਸੇ ਵਹਿ ਗਏ ਹਨ, ਜਿਸ ਨਾਲ ਆਵਾਜਾਈ ਪ੍ਰਭਾਵਿਤ ਹੋਈ ਹੈ। ਹਰਨਾਈ ਅਤੇ ਚਮਨ ਖੇਤਰਾਂ ਵਿੱਚ ਨਦੀਆਂ ਵਿੱਚ ਅਚਾਨਕ ਹੜ੍ਹ ਆਉਣ ਦੀਆਂ ਖ਼ਬਰਾਂ ਵੀ ਸਾਹਮਣੇ ਆਈਆਂ ਹਨ। PDMA ਦੇ ਅਨੁਸਾਰ, ਜ਼ਿਲ੍ਹਾ ਪ੍ਰਸ਼ਾਸਨ ਨਾਲ ਮਿਲ ਕੇ ਐਮਰਜੈਂਸੀ ਟੀਮਾਂ ਵੱਲੋਂ ਬਚਾਅ ਅਤੇ ਰਾਹਤ ਕਾਰਜ ਜਾਰੀ ਹਨ। ਰਿਪੋਰਟਾਂ ਅਨੁਸਾਰ, ਹਜ਼ਾਰਾਂ ਪਸ਼ੂ ਮਾਰੇ ਗਏ ਹਨ ਅਤੇ ਸਰੋਂ, ਕਣਕ ਅਤੇ ਛੋਲਿਆਂ ਸਮੇਤ ਖੜ੍ਹੀਆਂ ਫਸਲਾਂ ਨੂੰ ਵੱਡਾ ਨੁਕਸਾਨ ਪਹੁੰਚਿਆ ਹੈ। ਬੋਲਾਨ, ਯਾਰੋਕਾਜ਼ੋਈ, ਨੋਟਲ, ਗੰਦਾਵਾਹ ਅਤੇ ਝਾਲ ਮਾਗਸੀ ਨੂੰ ਜੋੜਨ ਵਾਲੀਆਂ ਸੜਕਾਂ ਦੇ ਨੁਕਸਾਨ ਕਾਰਨ ਕਈ ਇਲਾਕੇ ਇੱਕ ਦੂਜੇ ਤੋਂ ਕੱਟ ਗਏ ਹਨ, ਜਿਸ ਨਾਲ ਸਿੰਧ ਅਤੇ ਬਲੋਚਿਸਤਾਨ ਵਿਚਕਾਰ ਆਵਾਜਾਈ ਵੀ ਪ੍ਰਭਾਵਿਤ ਹੋਈ ਹੈ।