ਨਾਸਾ ਦਾ ਵੱਡਾ ਉਪਰਾਲਾ: ਓਰੀਅਨ ਯਾਨ ਚਾਰ ਪੁਲਾੜ ਯਾਤਰੀਆਂ ਸਮੇਤ ਚੰਦਰਮਾ ਦੇ ਚੱਕਰ ਲਈ ਰਵਾਨਾ

ਅਮਰੀਕੀ ਪੁਲਾੜ ਏਜੰਸੀ ਨਾਸਾ ਨੇ ਅੱਜ ਆਪਣੇ ਮਹੱਤਵਾਕਾਂਛੀ “ਆਰਟੇਮਿਸ-II” ਮਿਸ਼ਨ ਦੀ ਸਫਲ ਸ਼ੁਰੂਆਤ ਕੀਤੀ। ਸਵੇਰੇ 4:05 ਵਜੇ ਫਲੋਰੀਡਾ ਦੇ ਕੈਨੇਡੀ ਸਪੇਸ ਸੈਂਟਰ ਤੋਂ ਸਪੇਸ ਲਾਂਚ ਸਿਸਟਮ (SLS) ਰਾਕੇਟ ਰਾਹੀਂ ਓਰੀਅਨ ਪੁਲਾੜ ਯਾਨ ਚਾਰ ਪੁਲਾੜ ਯਾਤਰੀਆਂ ਨੂੰ ਲੈ ਕੇ ਚੰਦਰਮਾ ਵੱਲ ਰਵਾਨਾ ਹੋਇਆ। ਇਹ ਮਿਸ਼ਨ ਇਸ ਲਈ ਵਿਸ਼ੇਸ਼ ਮਹੱਤਵ ਰੱਖਦਾ ਹੈ ਕਿਉਂਕਿ 1972 ਵਿੱਚ ਅਪੋਲੋ 17 ਮਿਸ਼ਨ ਤੋਂ ਬਾਅਦ ਪਹਿਲੀ ਵਾਰ ਮਨੁੱਖ ਧਰਤੀ ਦੀ ਨੀਵੀਂ ਕਕਸ਼ (LEO) ਤੋਂ ਪਾਰ ਜਾ ਕੇ ਚੰਦਰਮਾ ਦੇ ਨੇੜੇ ਪਹੁੰਚਣਗੇ। ਇਸ ਯਾਤਰਾ ਦੌਰਾਨ ਚਾਰ ਪੁਲਾੜ ਯਾਤਰੀ ਚੰਦਰਮਾ ਦੀ ਪਰਿਕਰਮਾ ਕਰਨਗੇ ਅਤੇ ਫਿਰ ਧਰਤੀ ‘ਤੇ ਵਾਪਸ ਆਉਣਗੇ। ਇਹ ਪੂਰਾ ਮਿਸ਼ਨ 10 ਦਿਨਾਂ ਲਈ ਨਿਰਧਾਰਿਤ ਕੀਤਾ ਗਿਆ ਹੈ। ਲਾਂਚ ਤੋਂ ਠੀਕ ਪਹਿਲਾਂ ਤਕਨੀਕੀ ਚੁਣੌਤੀ ਵੀ ਸਾਹਮਣੇ ਆਈ। ਟੇਕਆਫ ਤੋਂ ਲਗਭਗ ਇੱਕ ਘੰਟਾ ਪਹਿਲਾਂ “ਲਾਂਚ ਅਬੋਰਟ ਸਿਸਟਮ” ਵਿੱਚ ਖ਼ਰਾਬੀ ਦਰਜ ਕੀਤੀ ਗਈ, ਜਿਸ ਕਾਰਨ ਲਾਂਚ ਪ੍ਰਕਿਰਿਆ ਨੂੰ ਅਸਥਾਈ ਤੌਰ ‘ਤੇ ਰੋਕਣਾ ਪਿਆ। ਇਹ ਪ੍ਰਣਾਲੀ ਐਮਰਜੈਂਸੀ ਦੌਰਾਨ ਪੁਲਾੜ ਯਾਤਰੀਆਂ ਦੀ ਸੁਰੱਖਿਆ ਯਕੀਨੀ ਬਣਾਉਣ ਲਈ ਬਹੁਤ ਮਹੱਤਵਪੂਰਨ ਹੁੰਦੀ ਹੈ। ਇੰਜੀਨੀਅਰਾਂ ਨੇ ਤੁਰੰਤ ਕਾਰਵਾਈ ਕਰਦੇ ਹੋਏ ਸਮੱਸਿਆ ਦਾ ਹੱਲ ਕੀਤਾ ਅਤੇ ਸੁਰੱਖਿਆ ਜਾਂਚ ਲਈ ਕਾਊਂਟਡਾਊਨ ਨੂੰ 10 ਮਿੰਟ ‘ਤੇ ਰੋਕਿਆ ਗਿਆ। ਸਾਰੇ ਮਹੱਤਵਪੂਰਨ ਪ੍ਰਣਾਲੀਆਂ ਦੀ ਜਾਂਚ ਤੋਂ ਬਾਅਦ ਇੰਜੀਨੀਅਰਾਂ ਵੱਲੋਂ “ਠੀਕ ਹੈ” ਦੀ ਰਿਪੋਰਟ ਦਿੱਤੀ ਗਈ। ਇਸ ਤੋਂ ਬਾਅਦ ਲਾਂਚ ਡਾਇਰੈਕਟਰ ਵੱਲੋਂ ਚਾਲਕ ਦਲ ਨੂੰ ਉਡਾਣ ਲਈ ਤਿਆਰ ਹੋਣ ਦਾ ਸੰਕੇਤ ਦਿੱਤਾ ਗਿਆ। ਮਿਸ਼ਨ ਕਮਾਂਡਰ ਰੀਡ ਵਾਈਜ਼ਮੈਨ ਨੇ ਉਡਾਣ ਤੋਂ ਪਹਿਲਾਂ ਕਿਹਾ, “ਅਸੀਂ ਸਾਰੀ ਮਨੁੱਖਤਾ ਦੀ ਖ਼ਾਤਰ ਜਾ ਰਹੇ ਹਾਂ।” ਇਸਦੇ ਤੁਰੰਤ ਬਾਅਦ ਚਾਰ RS-25 ਇੰਜਣ ਅਤੇ ਦੋ ਠੋਸ ਰਾਕੇਟ ਬੂਸਟਰ ਚਾਲੂ ਕੀਤੇ ਗਏ ਅਤੇ ਓਰੀਅਨ ਪੁਲਾੜ ਯਾਨ ਨੇ ਸਫਲਤਾਪੂਰਵਕ ਉਡਾਣ ਭਰੀ।