ਕੇਂਦਰ ਸਰਕਾਰ ਦਾ ਕਾਂਗਰਸ ਨੂੰ ਨੋਟਿਸ, 28 ਮਾਰਚ ਤੱਕ ਦਫ਼ਤਰ ਖਾਲੀ ਕਰਨ ਦੇ ਆਦੇਸ਼

ਕਾਂਗਰਸ ਪਾਰਟੀ ਨੂੰ ਰਾਜਧਾਨੀ ਦਿੱਲੀ ਵਿੱਚ ਸਥਿਤ ਆਪਣੇ ਦੋ ਪੁਰਾਣੇ ਦਫ਼ਤਰ ਖਾਲੀ ਕਰਨ ਲਈ ਅੰਤਿਮ ਨੋਟਿਸ ਜਾਰੀ ਕੀਤਾ ਗਿਆ ਹੈ। ਕੇਂਦਰੀ ਆਵਾਸ ਅਤੇ ਸ਼ਹਿਰੀ ਮਾਮਲਿਆਂ ਦੇ ਮੰਤਰਾਲੇ ਵੱਲੋਂ ਪਾਰਟੀ ਨੂੰ 24, ਅਕਬਰ ਰੋਡ ਅਤੇ 5, ਰਾਏਸੀਨਾ ਰੋਡ ਸਥਿਤ ਦਫ਼ਤਰ 28 ਮਾਰਚ ਤੱਕ ਖਾਲੀ ਕਰਨ ਦੇ ਹੁਕਮ ਦਿੱਤੇ ਗਏ ਹਨ। ਜਾਣਕਾਰੀ ਮੁਤਾਬਕ, ਅਕਬਰ ਰੋਡ ਸਥਿਤ ਬੰਗਲਾ ਸਾਲ 1978 ਤੋਂ ਕਾਂਗਰਸ ਪਾਰਟੀ ਦਾ ਮੁੱਖ ਦਫ਼ਤਰ ਰਿਹਾ ਹੈ। ਲਗਭਗ 48 ਸਾਲਾਂ ਤੱਕ ਇਸ ਥਾਂ ਤੋਂ ਪਾਰਟੀ ਦੀਆਂ ਗਤੀਵਿਧੀਆਂ ਚੱਲਦੀਆਂ ਰਹੀਆਂ ਅਤੇ ਕਈ ਮਹੱਤਵਪੂਰਨ ਰਣਨੀਤੀਆਂ ਇੱਥੇ ਤੈਅ ਕੀਤੀਆਂ ਗਈਆਂ। ਹਾਲਾਂਕਿ, ਪਿਛਲੇ ਸਾਲ ਕਾਂਗਰਸ ਨੇ ਕੋਟਲਾ ਮਾਰਗ ‘ਤੇ ਸਥਿਤ ਇੰਦਰਾ ਭਵਨ ਵਿੱਚ ਆਪਣਾ ਨਵਾਂ ਮੁੱਖ ਦਫ਼ਤਰ ਤਿਆਰ ਕਰ ਲਿਆ ਸੀ, ਪਰ ਪੁਰਾਣਾ ਦਫ਼ਤਰ ਅਜੇ ਵੀ ਵਰਤੋਂ ਵਿੱਚ ਹੈ। ਇਸ ਮਾਮਲੇ ‘ਤੇ ਕਾਂਗਰਸ ਦੇ ਸੀਨੀਅਰ ਆਗੂ ਅਤੇ ਵਕੀਲ ਅਭਿਸ਼ੇਕ ਮਨੂ ਸਿੰਘਵੀ ਨੇ ਸਰਕਾਰ ਦੇ ਇਸ ਕਦਮ ਨੂੰ “ਗੈਰ-ਕਾਨੂੰਨੀ ਅਤੇ ਰਾਜਨੀਤਿਕ ਤੌਰ ‘ਤੇ ਪ੍ਰੇਰਿਤ” ਕਰਾਰ ਦਿੱਤਾ ਹੈ। ਉਨ੍ਹਾਂ ਕਿਹਾ ਕਿ ਪਾਰਟੀ ਇਸ ਨੋਟਿਸ ਦੇ ਵਿਰੋਧ ਵਿੱਚ ਅਦਾਲਤ ਦਾ ਦਰਵਾਜ਼ਾ ਖੜਕਾਉਣ ਬਾਰੇ ਵਿਚਾਰ ਕਰ ਰਹੀ ਹੈ। ਪਾਰਟੀ ਸੂਤਰਾਂ ਅਨੁਸਾਰ, 24 ਅਕਬਰ ਰੋਡ ਵਾਲਾ ਦਫ਼ਤਰ ਕਾਂਗਰਸ ਲਈ ਇਤਿਹਾਸਕ ਮਹੱਤਵ ਰੱਖਦਾ ਹੈ ਅਤੇ ਇਸ ਨਾਲ ਕਈ ਅਹਿਮ ਯਾਦਾਂ ਜੁੜੀਆਂ ਹੋਈਆਂ ਹਨ। ਇਸ ਨੋਟਿਸ ਨੂੰ ਲੈ ਕੇ ਪਾਰਟੀ ਗੰਭੀਰ ਨਜ਼ਰ ਆ ਰਹੀ ਹੈ ਅਤੇ ਸੀਨੀਅਰ ਆਗੂ ਅੱਗੇ ਦੀ ਰਣਨੀਤੀ ਤੈਅ ਕਰਨ ਵਿੱਚ ਜੁਟੇ ਹੋਏ ਹਨ, ਤਾਂ ਜੋ ਉਚਿਤ ਸਮੇਂ ‘ਤੇ ਕਾਰਵਾਈ ਕੀਤੀ ਜਾ ਸਕੇ।