ਛਾਤੀ ਅਤੇ ਗਰਦਨ ਚੀਰ ਕੇ ਨਿਕਲਿਆ ਸਰੀਆ, ਡਾਕਟਰਾਂ ਨੇ ਕੀਤਾ ਸਫਲ ਇਲਾਜ

ਉੱਤਰ ਪ੍ਰਦੇਸ਼ ਦੇ ਬੁਲੰਦਸ਼ਹਿਰ ਵਿੱਚ ਇੱਕ ਦਰਦਨਾਕ ਹਾਦਸੇ ਦੌਰਾਨ 10 ਸਾਲ ਦੇ ਬੱਚੇ ਦੀ ਛਾਤੀ ਅਤੇ ਗਰਦਨ ਵਿੱਚੋਂ ਲੋਹੇ ਦਾ ਸਰੀਆ ਆਰ-ਪਾਰ ਹੋ ਗਿਆ। ਇਹ ਘਟਨਾ ਕੋਤਵਾਲੀ ਦੇਹਾਤ ਖੇਤਰ ਵਿੱਚ ਵਾਪਰੀ, ਜਦੋਂ ਬੱਚਾ ਇੱਕ ਉਸਾਰੀ ਅਧੀਨ ਘਰ ਵਿੱਚ ਆਪਣੀ ਗੇਂਦ ਲੈਣ ਲਈ ਗਿਆ ਸੀ। ਮਿਲੀ ਜਾਣਕਾਰੀ ਅਨੁਸਾਰ, ਮਿਰਜ਼ਾਪੁਰ ਪਿੰਡ ਦਾ ਰਹਿਣ ਵਾਲਾ ਦਿਵਯਾਂਸ਼ (10) ਆਪਣੇ ਭਰਾ-ਭੈਣਾਂ ਨਾਲ ਗਲੀ ਵਿੱਚ ਕ੍ਰਿਕਟ ਖੇਡ ਰਿਹਾ ਸੀ। ਖੇਡਦੇ ਸਮੇਂ ਗੇਂਦ ਨੇੜਲੇ ਉਸਾਰੀ ਅਧੀਨ ਮਕਾਨ ਵਿੱਚ ਚਲੀ ਗਈ। ਦਿਵਯਾਂਸ਼ ਗੇਂਦ ਲੈਣ ਲਈ ਅੰਦਰ ਗਿਆ ਅਤੇ ਵਾਪਸ ਆਉਂਦੇ ਸਮੇਂ ਫਿਸਲ ਕੇ ਇੱਕ ਲੋਹੇ ਦੇ ਸਰੀਏ ‘ਤੇ ਮੂੰਹ ਦੇ ਭਾਰ ਡਿੱਗ ਪਿਆ। ਸਰੀਆ ਉਸਦੀ ਛਾਤੀ ਵਿੱਚੋਂ ਹੋ ਕੇ ਗਰਦਨ ਤੱਕ ਨਿਕਲ ਗਿਆ। ਘਟਨਾ ਨੂੰ ਦੇਖ ਕੇ ਉੱਥੇ ਮੌਜੂਦ ਹੋਰ ਬੱਚੇ ਘਬਰਾ ਗਏ ਅਤੇ ਚੀਕਣ ਲੱਗੇ। ਰੌਲਾ ਸੁਣ ਕੇ ਬੱਚੇ ਦੀ ਮਾਂ ਅਨੀਤਾ ਅਤੇ ਆਸ-ਪਾਸ ਦੇ ਲੋਕ ਤੁਰੰਤ ਮੌਕੇ ‘ਤੇ ਪਹੁੰਚੇ। ਤੁਰੰਤ ਗੈਸ ਕਟਰ ਮੰਗਵਾ ਕੇ ਲੋਹੇ ਦੀ ਰਾਡ ਦੇ ਹੇਠਲੇ ਹਿੱਸੇ ਨੂੰ ਕੱਟਿਆ ਗਿਆ। ਲਗਭਗ ਚਾਰ ਫੁੱਟ ਲੰਬੀ ਰਾਡ ਦਾ ਇੱਕ ਹਿੱਸਾ ਬੱਚੇ ਦੇ ਸਰੀਰ ਅੰਦਰ ਅਤੇ ਦੂਜਾ ਬਾਹਰ ਸੀ। ਹੈਰਾਨੀ ਦੀ ਗੱਲ ਇਹ ਰਹੀ ਕਿ ਇੰਨੀ ਗੰਭੀਰ ਸੱਟ ਦੇ ਬਾਵਜੂਦ ਨਾ ਤਾਂ ਵੱਧ ਖੂਨ ਵਗਿਆ ਅਤੇ ਨਾ ਹੀ ਬੱਚਾ ਬੇਹੋਸ਼ ਹੋਇਆ। ਪਰਿਵਾਰ ਵੱਲੋਂ ਬੱਚੇ ਨੂੰ ਤੁਰੰਤ ਜ਼ਿਲ੍ਹਾ ਹਸਪਤਾਲ ਪਹੁੰਚਾਇਆ ਗਿਆ, ਜਿੱਥੇ ਮੁੱਢਲੀ ਸਹਾਇਤਾ ਦੇਣ ਤੋਂ ਬਾਅਦ ਉਸਨੂੰ ਨੋਇਡਾ ਰੈਫਰ ਕੀਤਾ ਗਿਆ। ਹਾਲਤ ਗੰਭੀਰ ਹੋਣ ਕਰਕੇ ਬਾਅਦ ਵਿੱਚ ਉਸਨੂੰ ਦਿੱਲੀ ਦੇ ਸਫਦਰਜੰਗ ਹਸਪਤਾਲ ਭੇਜਿਆ ਗਿਆ। ਉੱਥੇ ਡਾਕਟਰਾਂ ਨੇ ਸੀਟੀ ਸਕੈਨ ਸਮੇਤ ਕਈ ਟੈਸਟ ਕਰਨ ਤੋਂ ਬਾਅਦ ਲਗਭਗ 3.5 ਘੰਟਿਆਂ ਦਾ ਆਪ੍ਰੇਸ਼ਨ ਕਰਕੇ ਸਰੀਏ ਨੂੰ ਸਫਲਤਾਪੂਰਵਕ ਕੱਢ ਦਿੱਤਾ। ਡਾਕਟਰਾਂ ਮੁਤਾਬਕ ਸਰੀਆ ਬੱਚੇ ਦੀ ਛਾਤੀ ਅਤੇ ਗਰਦਨ ਵਿੱਚੋਂ ਲੰਘ ਗਿਆ ਸੀ, ਪਰ ਖੁਸ਼ਕਿਸਮਤੀ ਨਾਲ ਕੋਈ ਤੁਰੰਤ ਗੰਭੀਰ ਪੇਚੀਦਗੀ ਸਾਹਮਣੇ ਨਹੀਂ ਆਈ। ਆਪ੍ਰੇਸ਼ਨ ਤੋਂ ਬਾਅਦ ਬੱਚੇ ਨੂੰ ਸਰਜੀਕਲ ਵਾਰਡ ਤੋਂ ਐਮਰਜੈਂਸੀ ਵਾਰਡ ਵਿੱਚ ਸ਼ਿਫਟ ਕੀਤਾ ਗਿਆ ਹੈ ਅਤੇ ਉਸਦੀ ਹਾਲਤ ਸਥਿਰ ਦੱਸੀ ਜਾ ਰਹੀ ਹੈ। ਡਾਕਟਰਾਂ ਨੇ ਕਿਹਾ ਕਿ ਬੱਚਾ ਖਤਰੇ ਤੋਂ ਬਾਹਰ ਹੈ। ਦਿਵਯਾਂਸ਼ ਦੇ ਪਿਤਾ ਰਾਜਕੁਮਾਰ ਇਲੈਕਟ੍ਰੀਕਲ ਵਾਇਰਿੰਗ ਇੰਜੀਨੀਅਰ ਹਨ ਅਤੇ ਆਪਣੇ ਪਰਿਵਾਰ ਨਾਲ ਮਿਰਜ਼ਾਪੁਰ ਪਿੰਡ ਵਿੱਚ ਰਹਿੰਦੇ ਹਨ। ਪਰਿਵਾਰ ਵਿੱਚ ਉਸਦੀ ਮਾਤਾ ਅਨੀਤਾ, ਭਰਾ ਰਿਸ਼ਭ (11) ਅਤੇ ਭੈਣ ਵੰਦਨਾ ਵੀ ਸ਼ਾਮਲ ਹਨ। ਇਹ ਹਾਦਸਾ ਸ਼ਨੀਵਾਰ ਸਵੇਰੇ ਈਦ ਦੀ ਛੁੱਟੀ ਦੌਰਾਨ ਵਾਪਰਿਆ, ਜਦੋਂ ਬੱਚੇ ਗਲੀ ਵਿੱਚ ਖੇਡ ਰਹੇ ਸਨ।