ਅਸਾਮ ਤੇ ਮਿਜ਼ੋਰਮ 'ਚ ਅਸਾਮ ਰਾਈਫਲਜ਼ ਦਾ ਵੱਡਾ ਐਕਸ਼ਨ: 46.25 ਕਰੋੜ ਰੁਪਏ ਦੇ ਨਸ਼ੀਲੇ ਪਦਾਰਥ ਜ਼ਬਤ, 5 ਤਸਕਰ ਗ੍ਰਿਫ਼ਤਾਰ

ਨਸ਼ਾ ਤਸਕਰੀ ਦੇ ਖ਼ਿਲਾਫ਼ ਚਲਾਈ ਗਈ ਇੱਕ ਵਿਸ਼ੇਸ਼ ਮੁਹਿੰਮ ਦੌਰਾਨ ਅਸਾਮ ਰਾਈਫਲਜ਼ ਨੇ ਡਾਇਰੈਕਟੋਰੇਟ ਆਫ਼ ਰੈਵੇਨਿਊ ਇੰਟੈਲੀਜੈਂਸ (DRI) ਅਤੇ ਸਥਾਨਕ ਪੁਲਿਸ ਨਾਲ ਮਿਲ ਕੇ ਦੱਖਣੀ ਅਸਾਮ ਅਤੇ ਮਿਜ਼ੋਰਮ ਵਿੱਚ ਵੱਡੀ ਸਫ਼ਲਤਾ ਹਾਸਲ ਕੀਤੀ ਹੈ। ਦੋ ਵੱਖ-ਵੱਖ ਆਪ੍ਰੇਸ਼ਨਾਂ ਦੌਰਾਨ ਲਗਭਗ 46.25 ਕਰੋੜ ਰੁਪਏ ਦੀ ਅੰਤਰਰਾਸ਼ਟਰੀ ਕੀਮਤ ਵਾਲੇ ਸਿੰਥੈਟਿਕ ਨਸ਼ੇ ਜ਼ਬਤ ਕੀਤੇ ਗਏ ਹਨ ਅਤੇ 5 ਤਸਕਰਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। 27 ਕਿੱਲੋ ਤੋਂ ਵੱਧ 'ਯਾਬਾ' ਅਤੇ 'ਕ੍ਰਿਸਟਲ ਮੈਥ' ਬਰਾਮਦ ਇਨ੍ਹਾਂ ਦੋਵਾਂ ਕਾਰਵਾਈਆਂ ਦੌਰਾਨ ਕੁੱਲ 27.813 ਕਿਲੋਗ੍ਰਾਮ ਮੈਥਾਮਫੇਟਾਮਾਈਨ (Methamphetamine) ਜ਼ਬਤ ਕੀਤੀ ਗਈ ਹੈ। ਇਸ ਨਸ਼ੇ ਨੂੰ ਆਮ ਤੌਰ 'ਤੇ 'ਯਾਬਾ' (Yaba), 'ਪਾਰਟੀ ਟੈਬਲੇਟਸ' ਜਾਂ 'ਕ੍ਰੇਜ਼ੀ ਡਰੱਗ' ਕਿਹਾ ਜਾਂਦਾ ਹੈ, ਜੋ ਕਿ ਮੈਥਾਮਫੇਟਾਮਾਈਨ ਅਤੇ ਕੈਫੀਨ ਦਾ ਖ਼ਤਰਨਾਕ ਮਿਸ਼ਰਣ ਹੁੰਦਾ ਹੈ। ਭਾਰਤ ਵਿੱਚ ਪਾਬੰਦੀਸ਼ੁਦਾ ਇਹ ਸਿੰਥੈਟਿਕ ਨਸ਼ਾ ਜ਼ਿਆਦਾਤਰ ਮਿਆਂਮਾਰ ਤੋਂ ਉੱਤਰ-ਪੂਰਬੀ ਰਾਜਾਂ ਵਿੱਚ ਤਸਕਰੀ ਕੀਤਾ ਜਾਂਦਾ ਹੈ। ਪਹਿਲੀ ਕਾਰਵਾਈ: ਕਛਾਰ 'ਚ 40 ਕਰੋੜ ਦੀ ਕ੍ਰਿਸਟਲ ਮੈਥ ਫੜੀ ਰੱਖਿਆ ਬੁਲਾਰੇ ਅਨੁਸਾਰ, ਅਸਾਮ ਰਾਈਫਲਜ਼ ਅਤੇ ਸਿਲਚਰ DRI ਦੀ ਸਾਂਝੀ ਟੀਮ ਨੇ ਪੁਖ਼ਤਾ ਖੁਫ਼ੀਆ ਜਾਣਕਾਰੀ ਦੇ ਆਧਾਰ 'ਤੇ ਦੱਖਣੀ ਅਸਾਮ ਦੇ ਕਛਾਰ ਜ਼ਿਲ੍ਹੇ ਦੇ ਢੋਲਾਈ ਬਾਜ਼ਾਰ ਵਿੱਚ ਨਾਕਾਬੰਦੀ ਕੀਤੀ। ਇਸ ਦੌਰਾਨ ਨਸ਼ੀਲੇ ਪਦਾਰਥਾਂ ਦੀ ਇੱਕ ਸ਼ੱਕੀ ਖੇਪ ਨੂੰ ਰੋਕ ਕੇ 3 ਤਸਕਰਾਂ ਨੂੰ ਕਾਬੂ ਕੀਤਾ ਗਿਆ। ਤਲਾਸ਼ੀ ਦੌਰਾਨ 20 ਕਿਲੋਗ੍ਰਾਮ 'ਕ੍ਰਿਸਟਲ ਮੈਥਾਮਫੇਟਾਮਾਈਨ' (20 ਪੈਕੇਟ) ਬਰਾਮਦ ਹੋਈ, ਜਿਸ ਦੀ ਅੰਦਾਜ਼ਨ ਕੀਮਤ 40 ਕਰੋੜ ਰੁਪਏ ਦੱਸੀ ਜਾ ਰਹੀ ਹੈ। ਇਸ ਤੋਂ ਇਲਾਵਾ 3 ਮੋਬਾਈਲ ਫ਼ੋਨ ਅਤੇ 2 ਵਾਹਨ ਵੀ ਜ਼ਬਤ ਕੀਤੇ ਗਏ ਹਨ। ਮੁੱਢਲੀ ਜਾਂਚ ਮੁਤਾਬਕ ਇਹ ਖੇਪ ਮਿਜ਼ੋਰਮ ਤੋਂ ਲਿਆਂਦੀ ਗਈ ਸੀ ਅਤੇ ਸਿਲਚਰ ਰਾਹੀਂ ਅੱਗੇ ਭੇਜੀ ਜਾਣੀ ਸੀ। ਦੂਜੀ ਕਾਰਵਾਈ: ਆਈਜ਼ੌਲ 'ਚ 6.25 ਕਰੋੜ ਦੀ ਖੇਪ ਬਰਾਮਦ ਮਿਜ਼ੋਰਮ ਦੇ ਆਈਜ਼ੌਲ ਜ਼ਿਲ੍ਹੇ ਵਿੱਚ ਸਥਿਤ ਰਾਮਥਰ ਨੌਰਥ ਖੇਤਰ ਵਿੱਚ ਚਲਾਏ ਗਏ ਦੂਜੇ ਆਪ੍ਰੇਸ਼ਨ ਵਿੱਚ ਅਸਾਮ ਰਾਈਫਲਜ਼ ਨੇ 7.813 ਕਿਲੋਗ੍ਰਾਮ ਮੈਥਾਮਫੇਟਾਮਾਈਨ ਗੋਲੀਆਂ ਬਰਾਮਦ ਕੀਤੀਆਂ, ਜਿਨ੍ਹਾਂ ਦੀ ਕੀਮਤ ਲਗਭਗ 6.25 ਕਰੋੜ ਰੁਪਏ ਹੈ। ਇਸ ਮਾਮਲੇ ਵਿੱਚ 2 ਵਿਅਕਤੀਆਂ ਨੂੰ ਹਿਰਾਸਤ ਵਿੱਚ ਲਿਆ ਗਿਆ ਹੈ। ਫੜੇ ਗਏ ਮੁਲਜ਼ਮਾਂ ਅਤੇ ਜ਼ਬਤ ਨਸ਼ਿਆਂ ਨੂੰ ਨਾਰਕੋਟਿਕ ਡਰੱਗਜ਼ ਐਂਡ ਸਾਈਕੋਟ੍ਰੋਪਿਕ ਸਬਸਟੈਂਸ (NDPS) ਐਕਟ, 1985 ਤਹਿਤ ਅਗਲੇਰੀ ਕਾਨੂੰਨੀ ਕਾਰਵਾਈ ਲਈ ਮਿਜ਼ੋਰਮ ਪੁਲਿਸ ਹਵਾਲੇ ਕਰ ਦਿੱਤਾ ਗਿਆ ਹੈ। ਉੱਤਰ-ਪੂਰਬ 'ਚ ਤਸਕਰੀ ਦਾ ਅੰਤਰਰਾਸ਼ਟਰੀ ਨੈੱਟਵਰਕ ਅਧਿਕਾਰੀਆਂ ਨੇ ਦੱਸਿਆ ਕਿ ਮਿਜ਼ੋਰਮ ਦੇ 6 ਅਤੇ ਮਨੀਪੁਰ ਦੇ 5 ਜ਼ਿਲ੍ਹੇ ਮਿਆਂਮਾਰ ਨਾਲ 910 ਕਿਲੋਮੀਟਰ ਲੰਬੀ ਅੰਤਰਰਾਸ਼ਟਰੀ ਸਰਹੱਦ ਸਾਂਝੀ ਕਰਦੇ ਹਨ। 'ਗੋਲਡਨ ਟ੍ਰਾਈਐਂਗਲ' ਖੇਤਰ ਦੇ ਨੇੜੇ ਹੋਣ ਕਾਰਨ ਇਹ ਰਾਜ ਨਸ਼ਾ ਤਸਕਰੀ ਦੇ ਮੁੱਖ ਲਾਂਘੇ ਵਜੋਂ ਵਰਤੇ ਜਾ ਰਹੇ ਹਨ। ਏਜੰਸੀਆਂ ਦੀ ਆਪਸੀ ਤਾਲਮੇਲ ਅਤੇ ਸਟੀਕ ਖੁਫ਼ੀਆ ਜਾਣਕਾਰੀ ਸਦਕਾ ਹੀ ਇਸ ਵੱਡੇ ਤਸਕਰੀ ਨੈੱਟਵਰਕ ਦਾ ਭੰਡਾਫੋੜ ਹੋ ਸਕਿਆ ਹੈ।