ਮੈਨੀਟੋਬਾ ਵਿੱਚ ਬਰਫ਼ੀਲੀ ਸੜਕ ਬਣੀ ਕਹਿਰ, ਸਕੂਲ ਬੱਸ ਪਲਟੀ

ਮੈਨੀਟੋਬਾ ਦੇ ਸਵਾਨ ਰਿਵਰ ਕਸਬੇ ਨੇੜੇ ਮੰਗਲਵਾਰ ਸਵੇਰੇ ਬਰਫ਼ੀਲੇ ਮੌਸਮ ਕਾਰਨ ਇੱਕ ਵੱਡਾ ਸੜਕ ਹਾਦਸਾ ਵਾਪਰ ਗਿਆ, ਜਦੋਂ ਹਾਈਵੇਅ ’ਤੇ ਚੱਲ ਰਹੀ ਇੱਕ ਸਕੂਲ ਬੱਸ ਫਿਸਲ ਕੇ ਪਲਟ ਗਈ। ਹਾਦਸੇ ਵਿੱਚ ਕਈ ਵਿਦਿਆਰਥੀ ਜ਼ਖ਼ਮੀ ਹੋ ਗਏ, ਜਿਨ੍ਹਾਂ ਵਿੱਚੋਂ ਚਾਰ ਨੂੰ ਗੰਭੀਰ ਪਰ ਜਾਨ ਲਈ ਖ਼ਤਰਾ ਨਾ ਹੋਣ ਵਾਲੀਆਂ ਸੱਟਾਂ ਆਈਆਂ ਹਨ। ਆਰਸੀਐਮਪੀ (RCMP) ਮੁਤਾਬਕ ਇਹ ਹਾਦਸਾ ਹਾਈਵੇ 10 ’ਤੇ ਮੇਫ਼ਕਿੰਗ ਤੋਂ ਲਗਭਗ 13 ਕਿਲੋਮੀਟਰ ਦੱਖਣ ਵੱਲ ਸਵੇਰੇ ਕਰੀਬ 8:30 ਵਜੇ ਵਾਪਰਿਆ। ਸ਼ੁਰੂਆਤੀ ਜਾਂਚ ਵਿੱਚ ਸਾਹਮਣੇ ਆਇਆ ਹੈ ਕਿ ਪਿਛਲੇ ਦਿਨ ਪਏ ਮੀਂਹ ਤੋਂ ਬਾਅਦ ਸੜਕ ’ਤੇ ਬਣੀ ਬਰਫ਼ੀਲੀ ਪਰਤ ਹਾਦਸੇ ਦਾ ਮੁੱਖ ਕਾਰਨ ਬਣੀ। ਪੁਲਿਸ ਅਧਿਕਾਰੀਆਂ ਨੇ ਦੱਸਿਆ ਕਿ ਹਾਦਸੇ ਤੋਂ ਬਾਅਦ ਐਮਰਜੈਂਸੀ ਸੇਵਾਵਾਂ ਤੁਰੰਤ ਮੌਕੇ ’ਤੇ ਪਹੁੰਚ ਗਈਆਂ ਅਤੇ ਜ਼ਖ਼ਮੀ ਵਿਦਿਆਰਥੀਆਂ ਨੂੰ ਤੁਰੰਤ ਇਲਾਜ ਮੁਹੱਈਆ ਕਰਵਾਇਆ ਗਿਆ। ਕਈ ਵਿਦਿਆਰਥੀਆਂ ਨੂੰ ਮੌਕੇ ’ਤੇ ਮੁੱਢਲਾ ਇਲਾਜ ਦੇ ਕੇ ਬਾਅਦ ਵਿੱਚ ਸਾਵਧਾਨੀ ਵਜੋਂ ਹਸਪਤਾਲ ਭੇਜਿਆ ਗਿਆ। ਇਹ ਸਕੂਲ ਬੱਸ ਸਾਪੋਟਾਵੇਯਕ ਕ੍ਰੀ ਨੇਸ਼ਨ ਐਜੂਕੇਸ਼ਨ ਅਥੌਰਟੀ ਦੀ ਸੀ, ਜਿਸ ਵਿੱਚ ਨੌਵੀਂ ਤੋਂ ਬਾਰ੍ਹਵੀਂ ਗ੍ਰੇਡ ਤੱਕ ਦੇ ਲਗਭਗ 15 ਵਿਦਿਆਰਥੀ ਸਵਾਰ ਸਨ। ਸਾਪੋਟਾਵੇਯਕ ਕ੍ਰੀ ਨੇਸ਼ਨ ਦੇ ਚੀਫ਼ ਨੈਲਸਨ ਜਿਨੇਲ ਨੇ ਦੱਸਿਆ ਕਿ ਬਰਫ਼ੀਲੀ ਸੜਕ ਕਾਰਨ ਬੱਸ ਦਾ ਸੰਤੁਲਨ ਅਚਾਨਕ ਵਿਗੜ ਗਿਆ, ਜਿਸ ਨਾਲ ਇਹ ਹਾਦਸਾ ਵਾਪਰਿਆ। ਹਾਦਸੇ ਦੀ ਗੰਭੀਰਤਾ ਨੂੰ ਦੇਖਦੇ ਹੋਏ ਨੇੜਲੇ ਹਸਪਤਾਲਾਂ ਵਿੱਚ ਕੋਡ ਓਰੇਂਜ ਜਾਰੀ ਕੀਤਾ ਗਿਆ। ਮਾਪੇ ਆਪਣੇ ਬੱਚਿਆਂ ਦੀ ਖੇਰੀਅਤ ਜਾਣਨ ਲਈ ਹਸਪਤਾਲਾਂ ਵਿੱਚ ਪਹੁੰਚੇ, ਜਿੱਥੇ ਉਨ੍ਹਾਂ ਨੂੰ ਪ੍ਰਸ਼ਾਸਨ ਵੱਲੋਂ ਜਾਣਕਾਰੀ ਦਿੱਤੀ ਗਈ। ਪੁਲਿਸ ਵੱਲੋਂ ਹਾਦਸੇ ਸਬੰਧੀ ਜਾਂਚ ਜਾਰੀ ਹੈ।