ਮਾਦੁਰੋ ਦੀ ਗ੍ਰਿਫ਼ਤਾਰੀ ਮਗਰੋਂ ਕੈਨੇਡੀਅਨ ਤੇਲ ਕੰਪਨੀਆਂ ਦੇ ਸ਼ੇਅਰਾਂ ’ਚ ਭਾਰੀ ਗਿਰਾਵਟ

ਓਟਵਾ .ਵੀਕਐਂਡ ਦੌਰਾਨ ਅਮਰੀਕੀ ਫੌਜ ਵੱਲੋਂ ਵੇਨੇਜ਼ੂਏਲਾ ਦੇ ਰਾਸ਼ਟਰਪਤੀ ਨਿਕੋਲਸ ਮਾਦੁਰੋ ਦੀ ਗ੍ਰਿਫ਼ਤਾਰੀ ਤੋਂ ਬਾਅਦ ਸੋਮਵਾਰ ਸਵੇਰੇ ਕੈਨੇਡਾ ਦੀਆਂ ਵੱਡੀਆਂ ਤੇਲ ਕੰਪਨੀਆਂ ਦੇ ਸ਼ੇਅਰਾਂ ਵਿੱਚ ਤੇਜ਼ ਗਿਰਾਵਟ ਦਰਜ ਕੀਤੀ ਗਈ। ਇਸ ਅਚਾਨਕ ਘਟਨਾ ਨੇ ਗਲੋਬਲ ਤੇਲ ਮਾਰਕੀਟ ਵਿੱਚ ਅਣਸ਼ਚਿਤਤਾ ਪੈਦਾ ਕਰ ਦਿੱਤੀ, ਜਿਸਦਾ ਸਿੱਧਾ ਅਸਰ ਟੋਰਾਂਟੋ ਸਟਾਕ ਐਕਸਚੇਂਜ ’ਤੇ ਵੇਖਣ ਨੂੰ ਮਿਲਿਆ। ਟੋਰਾਂਟੋ ਸਟਾਕ ਐਕਸਚੇਂਜ ’ਤੇ ਕੈਨੇਡੀਅਨ ਨੈਚਰਲ ਰਿਸੋਰਸਿਜ਼ ਲਿਮਿਟਡ ਦੇ ਸ਼ੇਅਰ 3.79 ਡਾਲਰ, ਲਗਭਗ 8 ਫੀਸਦੀ ਦੀ ਕਮੀ ਨਾਲ 43.33 ਡਾਲਰ ’ਤੇ ਆ ਗਏ। ਇਸੇ ਤਰ੍ਹਾਂ ਸੇਨੋਵਸ ਐਨਰਜੀ ਇੰਕ. ਦੇ ਸ਼ੇਅਰਾਂ ਵਿੱਚ ਵੀ ਭਾਰੀ ਗਿਰਾਵਟ ਦਰਜ ਕੀਤੀ ਗਈ ਅਤੇ ਇਹ 2.08 ਡਾਲਰ, ਕਰੀਬ 8.7 ਫੀਸਦੀ ਡਿੱਗ ਕੇ 21.97 ਡਾਲਰ ’ਤੇ ਵਪਾਰ ਕਰਦੇ ਨਜ਼ਰ ਆਏ। ਇਸ ਤੋਂ ਇਲਾਵਾ, ਸਨਕੋਰ ਐਨਰਜੀ ਇੰਕ. ਦੇ ਸ਼ੇਅਰ ਵੀ 3.53 ਡਾਲਰ ਦੀ ਕਮੀ ਨਾਲ 59.08 ਡਾਲਰ ’ਤੇ ਆ ਗਏ। ਨਿਵੇਸ਼ਕਾਂ ਵੱਲੋਂ ਤੇਲ ਸੈਕਟਰ ਵਿੱਚ ਸਾਵਧਾਨੀ ਵਰਤਣ ਕਾਰਨ ਮਾਰਕੀਟ ਵਿੱਚ ਦਬਾਅ ਬਣਿਆ ਰਿਹਾ। ਵਿਸ਼ਲੇਸ਼ਕਾਂ ਦਾ ਕਹਿਣਾ ਹੈ ਕਿ ਇਹ ਗਿਰਾਵਟ ਵੇਨੇਜ਼ੂਏਲਾ ਨਾਲ ਜੁੜੀ ਭੂ-ਰਾਜਨੀਤਿਕ ਅਣਸ਼ਚਿਤਤਾ ਦਾ ਨਤੀਜਾ ਹੈ। ਵੇਨੇਜ਼ੂਏਲਾ ਕੋਲ ਦੁਨੀਆਂ ਦੇ ਸਭ ਤੋਂ ਵੱਡੇ ਤੇਲ ਭੰਡਾਰ ਹਨ, ਪਰ ਸਾਲਾਂ ਤੋਂ ਚੱਲ ਰਹੀ ਲਾਪਰਵਾਹੀ ਅਤੇ ਅੰਤਰਰਾਸ਼ਟਰੀ ਪਾਬੰਦੀਆਂ ਕਾਰਨ ਉੱਥੋਂ ਦਾ ਤੇਲ ਉਦਯੋਗ ਗੰਭੀਰ ਸੰਕਟ ਵਿੱਚ ਹੈ। ਇਸ ਦਰਮਿਆਨ, ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਵੱਲੋਂ ਇਹ ਸੰਕੇਤ ਵੀ ਦਿੱਤਾ ਗਿਆ ਹੈ ਕਿ ਅਮਰੀਕੀ ਤੇਲ ਕੰਪਨੀਆਂ ਵੇਨੇਜ਼ੂਏਲਾ ਦੇ ਤੇਲ ਖੇਤਰ ਨੂੰ ਮੁੜ ਸਥਿਰ ਕਰਨ ਵਿੱਚ ਭੂਮਿਕਾ ਨਿਭਾ ਸਕਦੀਆਂ ਹਨ। ਮਾਹਿਰਾਂ ਮੰਨਦੇ ਹਨ ਕਿ ਆਉਣ ਵਾਲੇ ਦਿਨਾਂ ਵਿੱਚ ਇਸ ਮਾਮਲੇ ਨਾਲ ਜੁੜੇ ਹੋਰ ਐਲਾਨ ਗਲੋਬਲ ਤੇਲ ਮਾਰਕੀਟ ’ਤੇ ਵੱਡਾ ਅਸਰ ਛੱਡ ਸਕਦੇ ਹਨ।