ਇੰਸਟਾਗ੍ਰਾਮ ਵਰਤੋਂਕਾਰਾਂ ਲਈ ਅਹਿਮ ਖ਼ਬਰ: ਭਾਰਤ ਵਿੱਚ ਹੁਣ ਘੱਟ ਦਿਖਾਈ ਦੇਵੇਗੀ ਅਸ਼ਲੀਲ ਅਤੇ ਹਿੰਸਕ ਸਮੱਗਰੀ, ਮੇਟਾ ਨੇ ਸਿਸਟਮ ਵਿੱਚ ਕੀਤਾ ਬਦਲਾਅ
ਪ੍ਰਮੁੱਖ ਸੋਸ਼ਲ ਮੀਡੀਆ ਕੰਪਨੀ ਮੇਟਾ ਪਲੇਟਫਾਰਮਜ਼ (Meta Platforms) ਨੇ ਮੰਗਲਵਾਰ ਨੂੰ ਜਾਣਕਾਰੀ ਦਿੱਤੀ ਹੈ ਕਿ ਉਸ ਨੇ ਭਾਰਤ ਲਈ ਖ਼ਾਸ ਤੌਰ ’ਤੇ ਇੰਸਟਾਗ੍ਰਾਮ (Instagram) ਦੇ ਰਿਕਮੈਂਡੇਸ਼ਨ ਸਿਸਟਮ (ਸਿਫ਼ਾਰਸ਼ ਪ੍ਰਣਾਲੀ) ਵਿੱਚ ਮਹੱਤਵਪੂਰਨ ਤਬਦੀਲੀਆਂ ਕੀਤੀਆਂ ਹਨ। ਇਸ ਪਹਿਲਕਦਮੀ ਦਾ ਮੁੱਖ ਉਦੇਸ਼ ਪਲੇਟਫਾਰਮ ’ਤੇ ਜਿਨਸੀ ਤੌਰ ’ਤੇ ਇਤਰਾਜ਼ਯੋਗ (ਅਸ਼ਲੀਲ) ਅਤੇ ਹਿੰਸਕ ਸਮੱਗਰੀ ਦੀ ਦਿੱਖ ਨੂੰ ਸੀਮਤ ਕਰਨਾ ਹੈ। ਕੰਪਨੀ ਵੱਲੋਂ ਇਹ ਕਦਮ ਅਜਿਹੇ ਸਮੇਂ ਚੁੱਕਿਆ ਗਿਆ ਹੈ ਜਦੋਂ ਭਾਰਤ ਸਰਕਾਰ ਆਨਲਾਈਨ ਪਲੇਟਫਾਰਮਾਂ ’ਤੇ ਸਾਂਝੀ ਕੀਤੀ ਜਾਣ ਵਾਲੀ ਸਮੱਗਰੀ ਨੂੰ ਲੈ ਕੇ ਆਪਣੀ ਨਿਗਰਾਨੀ ਹੋਰ ਸਖ਼ਤ ਕਰ ਰਹੀ ਹੈ। ਇਹ ਐਲਾਨ ਭਾਰਤ ਸਰਕਾਰ ਵੱਲੋਂ ਪਿਛਲੇ ਮਹੀਨੇ ਕੰਪਨੀ ਨੂੰ ਪੋਸਟਾਂ ਦੀ ਸਿਫ਼ਾਰਸ਼ ਕਰਨ ਦੇ ਤਰੀਕਿਆਂ ਦੀ ਸਮੀਖਿਆ ਕਰਨ ਅਤੇ ਹਿੰਸਾ ਭੜਕਾਉਣ ਜਾਂ ਜਨਤਕ ਵਿਵਸਥਾ ਨੂੰ ਭੰਗ ਕਰਨ ਵਾਲੀ ਸਮੱਗਰੀ ’ਤੇ ਜਾਂਚ ਪ੍ਰਕਿਰਿਆ ਨੂੰ ਮਜ਼ਬੂਤ ਕਰਨ ਦੇ ਨਿਰਦੇਸ਼ ਦਿੱਤੇ ਜਾਣ ਤੋਂ ਬਾਅਦ ਸਾਹਮਣੇ ਆਇਆ ਹੈ। ਮੇਟਾ ਨੇ ਦੱਸਿਆ ਕਿ ਉਸ ਨੇ ਵਰਤੋਂਕਾਰਾਂ (ਯੂਜ਼ਰਜ਼) ਵੱਲੋਂ ਪ੍ਰਾਪਤ ਹੋਈ ਫੀਡਬੈਕ ਦੇ ਆਧਾਰ ’ਤੇ ਪਿਛਲੇ ਇੱਕ ਸਾਲ ਦੌਰਾਨ ਆਪਣੇ ਡਿਫਾਲਟ ਸੁਰੱਖਿਆ ਉਪਾਵਾਂ ਵਿੱਚ ਲਗਾਤਾਰ ਸੁਧਾਰ ਕੀਤਾ ਹੈ। ਕੰਪਨੀ ਨੇ ਸਪੱਸ਼ਟ ਕੀਤਾ ਹੈ ਕਿ ਭਾਰਤ ਵਿੱਚ ਲਾਗੂ ਕੀਤੇ ਗਏ ਇਹ ਨਵੇਂ ਬਦਲਾਅ ਮੁੱਖ ਤੌਰ ’ਤੇ ਉਨ੍ਹਾਂ ਖਾਤਿਆਂ (ਅਕਾਊਂਟਸ) ਤੋਂ ਆਉਣ ਵਾਲੀਆਂ ਸਿਫ਼ਾਰਸ਼ਾਂ ਨੂੰ ਪ੍ਰਭਾਵਿਤ ਕਰਨਗੇ ਜਿਨ੍ਹਾਂ ਨੂੰ ਵਰਤੋਂਕਾਰ ਫਾਲੋ ਨਹੀਂ ਕਰਦੇ। ਮੇਟਾ ਮੁਤਾਬਕ ਇਹ ਤਬਦੀਲੀਆਂ ਇਸ ਗੱਲ ਨਾਲ ਸਬੰਧਤ ਹਨ ਕਿ ਇੰਸਟਾਗ੍ਰਾਮ ਕਿਸ ਤਰ੍ਹਾਂ ਦੀ ਸਮੱਗਰੀ ਨੂੰ ਉਤਸ਼ਾਹਿਤ (ਪ੍ਰਮੋਟ) ਕਰਦਾ ਹੈ, ਨਾ ਕਿ ਕਿਸੇ ਸਮੱਗਰੀ ’ਤੇ ਪੂਰੀ ਤਰ੍ਹਾਂ ਪਾਬੰਦੀ ਲਗਾਉਣ ਨਾਲ। ਜ਼ਿਕਰਯੋਗ ਹੈ ਕਿ ਭਾਰਤ ਦੇ ਤਕਨਾਲੋਜੀ ਮੰਤਰਾਲੇ ਨੇ 10 ਅਕਤੂਬਰ ਨੂੰ ਜਾਰੀ ਕੀਤੀ ਇੱਕ ਐਡਵਾਇਜ਼ਰੀ ਵਿੱਚ ਮੇਟਾ ਨੂੰ ਆਪਣੀ ਰੈਂਕਿੰਗ ਅਤੇ ਰਿਕਮੈਂਡੇਸ਼ਨ ਪ੍ਰਣਾਲੀ ਦੀ ਸਮੀਖਿਆ ਕਰਨ ਲਈ ਕਿਹਾ ਸੀ, ਤਾਂ ਜੋ ਸੰਭਾਵੀ ਤੌਰ ’ਤੇ ਗੁੰਮਰਾਹਕੁੰਨ, ਤੋੜ-ਮਰੋੜ ਕੇ ਪੇਸ਼ ਕੀਤੀ ਗਈ ਜਾਂ ਪ੍ਰਸੰਗ ਤੋਂ ਹਟ ਕੇ ਦਿੱਤੀ ਗਈ ਸਮੱਗਰੀ ਨੂੰ ਬੇਲੋੜਾ ਉਤਸ਼ਾਹਿਤ ਨਾ ਕੀਤਾ ਜਾਵੇ। ਹਾਲਾਂਕਿ, ਮੇਟਾ ਨੇ ਬਿਨਾਂ ਕੋਈ ਬੁਨਿਆਦੀ ਅੰਕੜੇ ਸਾਂਝੇ ਕੀਤੇ ਕਿਹਾ ਹੈ ਕਿ ਭਾਰਤ ਵਿੱਚ ਲੋਕ ਹੁਣ ਇੱਕ ਸਾਲ ਪਹਿਲਾਂ ਦੇ ਮੁਕਾਬਲੇ ਸਿਫ਼ਾਰਸ਼ ਕੀਤੀ ਗਈ ਸਮੱਗਰੀ ਬਾਰੇ ਲਗਪਗ ਅੱਧੀ ਰਿਪੋਰਟ ਕਰਦੇ ਹਨ। ਇਸ ਤੋਂ ਇਲਾਵਾ, ਭਾਰਤ ਦੇ ਆਈ.ਟੀ. (IT) ਮੰਤਰਾਲੇ ਨੇ ਮੇਟਾ ਨੂੰ ਵਰਤੋਂਕਾਰਾਂ ਨੂੰ ਕਿਸੇ ਇੱਕ ਜਾਂ ਸੀਮਤ ਬਿਰਤਾਂਤ (ਨੈਰੇਟਿਵ) ਦੇ ਪ੍ਰਭਾਵ ਹੇਠ ਆਉਣ ਤੋਂ ਬਚਾਉਣ ਅਤੇ ਇਸ ਸਬੰਧੀ ਚੁੱਕੇ ਗਏ ਕਦਮਾਂ ਬਾਰੇ ਰਿਪੋਰਟ ਦੇਣ ਲਈ ਵੀ ਕਿਹਾ ਸੀ। ਦੂਜੇ ਪਾਸੇ, ਮੇਟਾ ਨੇ ਆਪਣੇ ਇਨ੍ਹਾਂ ਤਾਜ਼ਾ ਬਦਲਾਵਾਂ ਨੂੰ ਸਿੱਧੇ ਤੌਰ ’ਤੇ ਸਰਕਾਰੀ ਐਡਵਾਇਜ਼ਰੀ ਨਾਲ ਨਹੀਂ ਜੋੜਿਆ ਹੈ। ਗੌਰਤਲਬ ਹੈ ਕਿ ਕੰਪਨੀ ਇਸ ਤੋਂ ਪਹਿਲਾਂ ਸਿਆਸੀ ਸਮੱਗਰੀ ਨੂੰ ਘਟਾਉਣ ਲਈ ਕੈਨੇਡਾ ਅਤੇ ਬ੍ਰਾਜ਼ੀਲ ਵਰਗੇ ਦੇਸ਼ਾਂ ਵਿੱਚ ਵੀ ਆਪਣੇ ਫੇਸਬੁੱਕ ਪਲੇਟਫਾਰਮ ਦੀ ਸਮੱਗਰੀ ਰੈਂਕਿੰਗ ਵਿੱਚ ਬਦਲਾਅ ਕਰ ਚੁੱਕੀ ਹੈ।