ਰਾਜ ਸਭਾ ਚੇਅਰਮੈਨ ਨੇ ਸੰਸਦ ਮੈਂਬਰਾਂ ਨੂੰ ਬਜਟ ਸੈਸ਼ਨ ਦੌਰਾਨ ਸੰਯਮ ਵਰਤਣ ਦਾ ਦਿੱਤਾ ਸੱਦਾ

ਰਾਜ ਸਭਾ ਦੇ ਚੇਅਰਮੈਨ ਸੀ.ਪੀ. ਰਾਧਾਕ੍ਰਿਸ਼ਨਨ ਨੇ ਵੀਰਵਾਰ ਨੂੰ ਉਪਰਲੇ ਸਦਨ ਦੇ 217ਵੇਂ ਸੈਸ਼ਨ ਦੀ ਸ਼ੁਰੂਆਤ ਕਰਦਿਆਂ ਮੈਂਬਰਾਂ ਨੂੰ ਕੇਂਦਰੀ ਬਜਟ 2026-27 ਅਤੇ ਹੋਰ ਮਹੱਤਵਪੂਰਨ ਵਿਧਾਨਿਕ ਪ੍ਰਸਤਾਵਾਂ ’ਤੇ ਚਰਚਾ ਦੌਰਾਨ ਸੰਸਦੀ ਮਰਿਯਾਦਾ ਦੇ ਉੱਚੇ ਮਿਆਰਾਂ ਨੂੰ ਬਰਕਰਾਰ ਰੱਖਣ ਦੀ ਅਪੀਲ ਕੀਤੀ। ਆਪਣੇ ਸ਼ੁਰੂਆਤੀ ਸੰਬੋਧਨ ਵਿੱਚ, ਰਾਧਾਕ੍ਰਿਸ਼ਨਨ ਨੇ ਭਾਰਤ ਦੀ ਦੁਨੀਆ ਦੀ ਸਭ ਤੋਂ ਤੇਜ਼ੀ ਨਾਲ ਵਧ ਰਹੀ ਪ੍ਰਮੁੱਖ ਅਰਥਵਿਵਸਥਾ ਵਜੋਂ ਸਥਿਤੀ ਦਾ ਜ਼ਿਕਰ ਕੀਤਾ, ਜੋ ਜਲਦੀ ਹੀ ਤੀਜੀ ਸਭ ਤੋਂ ਵੱਡੀ ਅਰਥਵਿਵਸਥਾ ਬਣਨ ਲਈ ਤਿਆਰ ਹੈ। ਉਨ੍ਹਾਂ ਕਿਹਾ, "ਵਿਸ਼ਵ ਅਰਥਵਿਵਸਥਾ ਵਿੱਚ ਭਾਰਤ ਦਾ ਵਧਦਾ ਪ੍ਰਭਾਵ ਅਤੇ ਕੱਦ ਦੇਸ਼ ਦੀ ਆਰਥਿਕ ਦਿਸ਼ਾ ਨੂੰ ਘੜਨ ਵਿੱਚ ਸੰਸਦ ਮੈਂਬਰਾਂ ਵਜੋਂ ਸਾਡੀ ਭੂਮਿਕਾ ਨੂੰ ਅਹਿਮ ਬਣਾਉਂਦਾ ਹੈ।" ਚੇਅਰਮੈਨ ਨੇ ਦੱਸਿਆ ਕਿ 30 ਬੈਠਕਾਂ ਵਾਲੇ ਇਸ ਸੈਸ਼ਨ ਵਿੱਚ ਕੇਂਦਰੀ ਬਜਟ ਅਤੇ ਵਿਧਾਨਿਕ ਪ੍ਰਸਤਾਵਾਂ ਦੀ ਜਾਂਚ 'ਤੇ ਧਿਆਨ ਦਿੱਤਾ ਜਾਵੇਗਾ, ਜਦਕਿ ਵਿਭਾਗਾਂ ਨਾਲ ਸਬੰਧਤ ਸੰਸਦੀ ਸਥਾਈ ਕਮੇਟੀਆਂ ਛੁੱਟੀ ਦੌਰਾਨ ਗ੍ਰਾਂਟਾਂ ਦੀਆਂ ਮੰਗਾਂ ਦੀ ਘੋਖ ਕਰਨਗੀਆਂ। ਉਨ੍ਹਾਂ ਮੈਂਬਰਾਂ ਨੂੰ ਸਦਨ ਅਤੇ ਕਮੇਟੀਆਂ ਦੀਆਂ ਵਿਚਾਰ-ਵਟਾਂਦਰੇ ਵਿੱਚ ਪ੍ਰਭਾਵਸ਼ਾਲੀ ਯੋਗਦਾਨ ਪਾਉਣ ਲਈ ਕਿਹਾ।