ਅਮਰੀਕਾ ਦੇ ਮਸ਼ਹੂਰ ਕੈਨੇਡੀ ਪਰਿਵਾਰ ਨਾਲ ਜੁੜੀ ਇੱਕ ਦੁਖਦਾਈ ਖ਼ਬਰ ਸਾਹਮਣੇ ਆਈ ਹੈ। ਰੌਬਰਟ ਅਤੇ ਐਥੇਲ ਕੈਨੇਡੀ ਦੀ ਪੋਤੀ ਅਤੇ ਰੌਬਰਟ ਐੱਫ. ਕੈਨੇਡੀ ਜੂਨੀਅਰ ਦੀ ਭਤੀਜੀ ਕਾਇਲ ਫ੍ਰਾਂਸਿਸ ਕੈਨੇਡੀ ਦਾ 42 ਸਾਲ ਦੀ ਉਮਰ ਵਿੱਚ ਦੇਹਾਂਤ ਹੋ ਗਿਆ ਹੈ। ਉਨ੍ਹਾਂ ਦੀ ਮੌਤ 21 ਸਤੰਬਰ ਨੂੰ ਮੈਸੇਚਿਉਸੇਟਸ ਦੇ ਵੈਸਟਵੁੱਡ ਵਿਖੇ ਹੋਈ, ਹਾਲਾਂਕਿ ਉਨ੍ਹਾਂ ਦੀ ਮੌਤ ਦੇ ਅਸਲ ਕਾਰਨਾਂ ਦਾ ਅਜੇ ਤੱਕ ਖ਼ੁਲਾਸਾ ਨਹੀਂ ਹੋ ਸਕਿਆ ਹੈ। ਮ੍ਰਿਤਕ ਕਾਇਲ ਫ੍ਰਾਂਸਿਸ ਕੈਨੇਡੀ ਆਪਣੀ ਸਮਾਜਿਕ ਸੇਵਾ ਅਤੇ ਸਰਗਰਮੀਆਂ ਲਈ ਜਾਣੇ ਜਾਂਦੇ ਸਨ। ਉਹ ਸਿੱਖਿਆ ਖੇਤਰ ਵਿੱਚ ਸੁਧਾਰਾਂ ਅਤੇ ਅਪਾਹਜ ਲੋਕਾਂ ਦੇ ਅਧਿਕਾਰਾਂ ਦੀ ਰਾਖੀ ਲਈ ਮੋਹਰੀ ਹੋ ਕੇ ਕੰਮ ਕਰਦੀ ਸੀ। ਇਸ ਤੋਂ ਪਹਿਲਾਂ ਉਹ ਇੱਕ ਅਧਿਆਪਕਾ ਵਜੋਂ ਵੀ ਆਪਣੀਆਂ ਸੇਵਾਵਾਂ ਨਿਭਾ ਚੁੱਕੀ ਸੀ। ਜ਼ਿਕਰਯੋਗ ਹੈ ਕਿ ਸਾਲ 2019 ਵਿੱਚ ਉਸ ਨੇ ਪ੍ਰਸਿੱਧ ਬੋਸਟਨ ਮੈਰਾਥਨ ਵਿੱਚ ਵੀ ਹਿੱਸਾ ਲਿਆ ਸੀ। ਪਰ ਬਦਕਿਸਮਤੀ ਨਾਲ ਸਾਲ 2020 ਵਿੱਚ ਰੀੜ੍ਹ ਦੀ ਹੱਡੀ ਵਿੱਚ ਗੰਭੀਰ ਸੱਟ ਲੱਗਣ ਕਾਰਨ ਉਹ ਲੰਬੇ ਸਮੇਂ ਲਈ ਅਧਰੰਗ (ਪੈਰਾਲਿਸਿਸ) ਦਾ ਸ਼ਿਕਾਰ ਹੋ ਗਈ ਸੀ। ਇਸ ਮੁਸ਼ਕਲ ਦੌਰ ਵਿੱਚੋਂ ਗੁਜ਼ਰਨ ਤੋਂ ਬਾਅਦ ਉਸ ਨੇ ਸਮਾਜ ਵਿੱਚ ਅਪਾਹਜ ਲੋਕਾਂ ਨਾਲ ਹੋਣ ਵਾਲੇ ਵਿਤਕਰੇ ਅਤੇ ਪੱਖਪਾਤ ਵਿਰੁੱਧ ਜ਼ੋਰਦਾਰ ਆਵਾਜ਼ ਉਠਾਉਣੀ ਸ਼ुरू ਕਰ ਦਿੱਤੀ ਸੀ। ਕੈਨੇਡੀ ਪਰਿਵਾਰ ਲਈ ਇਹ ਕੋਈ ਪਹਿਲਾ ਵੱਡਾ ਸਦਮਾ ਨਹੀਂ ਹੈ। ਕਾਇਲ ਦੇ ਪਿਤਾ ਮਾਈਕਲ ਕੈਨੇਡੀ ਦੀ ਵੀ ਸਾਲ 1997 ਵਿੱਚ ਕੋਲੋਰਾਡੋ ਵਿਖੇ ਸਕੀਇੰਗ (ਬਰਫ਼ ਉੱਤੇ ਤਿਲਕਣ ਵਾਲੀ ਖੇਡ) ਦੌਰਾਨ ਵਾਪਰੇ ਇੱਕ ਹਾਦਸੇ ਵਿੱਚ ਮੌਤ ਹੋ ਗਈ ਸੀ। ਕਾਇਲ ਦੇ ਬੇਵਕਤ ਦੇਹਾਂਤ ਨਾਲ ਪਰਿਵਾਰ ਅਤੇ ਉਨ੍ਹਾਂ ਦੇ ਜਾਣਕਾਰਾਂ ਵਿੱਚ ਸੋਗ ਦੀ ਲਹਿਰ ਦੌੜ ਗਈ ਹੈ।