ਨਿਊਯਾਰਕ, ਸੰਯੁਕਤ ਰਾਸ਼ਟਰ ਸੁਰੱਖਿਆ ਪਰਿਸ਼ਦ ਦੀ ਅਫਗਾਨਿਸਤਾਨ ਦੀ ਸਥਿਤੀ ਬਾਰੇ ਮੀਟਿੰਗ ਦੌਰਾਨ ਭਾਰਤ ਨੇ ਪਾਕਿਸਤਾਨ ‘ਤੇ ਤਿੱਖਾ ਹਮਲਾ ਕਰਦਿਆਂ ਕਿਹਾ ਕਿ 9/11 ਦੇ ਹਮਲਿਆਂ ਦੇ “ਸੂਤਰਧਾਰ” ਕਿਸੇ ਗੁਫ਼ਾ ਜਾਂ ਬੀਆਬਾਨ ਇਲਾਕਿਆਂ ਵਿੱਚ ਨਹੀਂ, ਸਗੋਂ ਆਬਾਦ ਕਲੋਨੀਆਂ ਵਿੱਚ ਲੁਕੇ ਹੋਏ ਸਨ। ਭਾਰਤ ਦੇ ਸਥਾਈ ਪ੍ਰਤੀਨਿਧ ਹਰੀਸ਼ ਪਰਵਥਨੇਨੀ ਨੇ 11 ਸਤੰਬਰ, 2001 ਦੇ ਹਮਲਿਆਂ ਦਾ ਇਤਿਹਾਸ ਯਾਦ ਕਰਵਾਉਂਦਿਆਂ ਕਿਹਾ ਕਿ ਅਲ-ਕਾਇਦਾ ਦੇ ਨੇਤਾ ਓਸਾਮਾ ਬਿਨ ਲਾਦੇਨ ਅਤੇ ਖਾਲਿਦ ਸ਼ੇਖ ਮੁਹੰਮਦ ਅੰਤ ਵਿੱਚ ਦੂਰ-ਦੁਰਾਡੇ ਦੇ ਟਿਕਾਣਿਆਂ ਦੀ ਬਜਾਏ ਆਬਾਦ ਭਾਈਚਾਰਿਆਂ ਵਿੱਚੋਂ ਮਿਲੇ ਸਨ। ਉਨ੍ਹਾਂ ਕਿਹਾ ਕਿ ਅੰਤਰਰਾਸ਼ਟਰੀ ਭਾਈਚਾਰੇ ਨੇ 9/11 ਤੋਂ ਬਾਅਦ ਅਤਿਵਾਦ ਦੇ ਖ਼ਿਲਾਫ਼ ਵੈਸ਼ਵਿਕ ਮੁਹਿੰਮ ਦਾ ਸਮਰਥਨ ਕੀਤਾ ਸੀ, ਪਰ ਇਹ ਨਾ ਭੁੱਲਣਾ ਚਾਹੀਦਾ ਹੈ ਕਿ ਅਲ-ਕਾਇਦਾ ਨੇ ਆਪਣੇ ਸਹਿਯੋਗੀਆਂ ਰਾਹੀਂ ਅਫਗਾਨਿਸਤਾਨ ਤੋਂ ਬਾਹਰ ਵੀ ਰਣਨੀਤਕ ਡੂੰਘਾਈ ਬਣਾਈ ਸੀ। ਪਰਵਥਨੇਨੀ ਨੇ ਸਿੱਧਾ ਪਾਕਿਸਤਾਨ ਵੱਲ ਇਸ਼ਾਰਾ ਕਰਦਿਆਂ ਕਿਹਾ, “ਹਰ ਮਾਮਲੇ ਵਿੱਚ ਇਹ ਗੁਫ਼ਾਵਾਂ ਜਾਂ ਬੀਆਬਾਨਾਂ ਵਿੱਚ ਲੁਕੇ ਹੋਏ ਭਗੌੜੇ ਨਹੀਂ ਸਨ, ਇਹ ਉਹ ਆਦਮੀ ਸਨ ਜੋ ਲੰਬੇ ਸਮੇਂ ਤੋਂ ਫੜੇ ਜਾਣ ਤੋਂ ਬਚਦੇ ਰਹੇ। ਇਸ ਦਲਦਲ ਨੂੰ ਸੁਕਾਉਣਾ ਜ਼ਰੂਰੀ ਹੈ ਜਿਸ ਨੇ ਮਨੁੱਖਤਾ ਦੇ ਅਜਿਹੇ ਰਾਖਸ਼ਾਂ ਨੂੰ ਪ੍ਰਫੁੱਲਤ ਹੋਣ ਲਈ ਅਨੁਕੂਲ ਮਾਹੌਲ ਦਿੱਤਾ।” ਭਾਰਤ ਨੇ ਜ਼ੋਰ ਦੇ ਕੇ ਕਿਹਾ ਕਿ ਉਹੀ “ਸਹੂਲਤ ਭਰਿਆ ਮਾਹੌਲ” ਅੱਜ ਵੀ ਲਸ਼ਕਰ-ਏ-ਤੋਇਬਾ ਅਤੇ ਜੈਸ਼-ਏ-ਮੁਹੰਮਦ ਵਰਗੇ ਅਤਿਵਾਦੀ ਸਮੂਹਾਂ ਨੂੰ ਪਨਾਹ ਦੇ ਰਿਹਾ ਹੈ।