ਨੂਕ ਵਿੱਚ ਕੈਨੇਡੀਅਨ ਕੌਂਸੂਲੇਟ ਦਾ ਉਦਘਾਟਨ ਅੱਜ, ਉੱਚ ਅਧਿਕਾਰੀ ਹੋਣਗੇ ਸ਼ਾਮਿਲ

ਕੈਨੇਡਾ ਵੱਲੋਂ ਗ੍ਰੀਨਲੈਂਡ ਵਿੱਚ ਆਪਣੀ ਕੂਟਨੀਤਿਕ ਹਾਜ਼ਰੀ ਨੂੰ ਮਜ਼ਬੂਤ ਕਰਦੇ ਹੋਏ ਅੱਜ ਰਾਜਧਾਨੀ ਨੂਕ ਵਿੱਚ ਨਵੇਂ ਕੈਨੇਡੀਅਨ ਕੌਂਸੂਲੇਟ ਦਾ ਅਧਿਕਾਰਿਕ ਉਦਘਾਟਨ ਕੀਤਾ ਜਾ ਰਿਹਾ ਹੈ। ਕੈਨੇਡਾ ਦੀ ਵਿਦੇਸ਼ ਮਾਮਲੇ ਮੰਤਰੀ ਅਨੀਤਾ ਆਨੰਦ ਇਸ ਕੌਂਸੂਲੇਟ ਦਾ ਉਦਘਾਟਨ ਕਰਨਗੇ। ਇਸ ਨਵੇਂ ਕੂਟਨੀਤਿਕ ਮਿਸ਼ਨ ਨਾਲ ਕੈਨੇਡਾ ਅਤੇ ਗ੍ਰੀਨਲੈਂਡ ਵਿਚਕਾਰ ਮੌਸਮੀ ਤਬਦੀਲੀ, ਇਨੂਇਟ ਕੌਮ ਦੇ ਹੱਕਾਂ ਅਤੇ ਰੱਖਿਆ ਸਹਿਯੋਗ ਵਰਗੇ ਮੁੱਖ ਮੋੜਾਂ ‘ਤੇ ਭਾਈਚਾਰੇ ਨੂੰ ਹੋਰ ਮਜ਼ਬੂਤ ਕਰਨ ਦੀ ਉਮੀਦ ਜਤਾਈ ਜਾ ਰਹੀ ਹੈ। ਆਰਕਟਿਕ ਖੇਤਰ ਵਿੱਚ ਵਧ ਰਹੀ ਭੂ-ਰਾਜਨੀਤਿਕ ਮਹੱਤਤਾ ਦੇ ਮੱਦੇਨਜ਼ਰ ਇਸ ਕਦਮ ਨੂੰ ਅਹਿਮ ਮੰਨਿਆ ਜਾ ਰਿਹਾ ਹੈ। ਉਦਘਾਟਨ ਸਮਾਗਮ ਵਿੱਚ ਕੈਨੇਡਾ ਦੀ ਗਵਰਨਰ ਜਨਰਲ ਮੇਰੀ ਸਾਇਮਨ ਅਤੇ ਆਰਕਟਿਕ ਮਾਮਲਿਆਂ ਲਈ ਕੈਨੇਡਾ ਦੀ ਰਾਜਦੂਤ ਵਰਜੀਨੀਆ ਮੀਅਰਨਜ਼ ਵੀ ਹਾਜ਼ਰੀ ਲਗਾਉਣਗੇ। ਇਹ ਹਾਜ਼ਰੀ ਕੈਨੇਡਾ ਵੱਲੋਂ ਆਰਕਟਿਕ ਖੇਤਰ ਪ੍ਰਤੀ ਵਚਨਬੱਧਤਾ ਨੂੰ ਦਰਸਾਉਂਦੀ ਹੈ। ਇਸ ਮੌਕੇ ਕੈਨੇਡੀਅਨ ਕੋਸਟ ਗਾਰਡ ਦਾ ਆਇਸਬ੍ਰੇਕਰ ਜਹਾਜ਼ ਵੀ ਮੌਜੂਦ ਰਹੇਗਾ, ਜਿਸਨੂੰ ਗ੍ਰੀਨਲੈਂਡ ਦੀ ਭੂਗੋਲਿਕ ਅਖੰਡਤਾ ਲਈ ਕੈਨੇਡਾ ਦੇ ਸਮਰਥਨ ਦੇ ਤੌਰ ‘ਤੇ ਵੇਖਿਆ ਜਾ ਰਿਹਾ ਹੈ। ਵਿਸ਼ਲੇਸ਼ਕਾਂ ਅਨੁਸਾਰ ਇਹ ਕਦਮ ਆਰਕਟਿਕ ਖੇਤਰ ਵਿੱਚ ਕੈਨੇਡਾ ਦੀ ਰਣਨੀਤਿਕ ਪਹੁੰਚ ਨੂੰ ਹੋਰ ਮਜ਼ਬੂਤ ਕਰੇਗਾ।