ਮਸ਼ਹੂਰ ਅਦਾਕਾਰਾ ਰਸ਼ਮਿਕਾ ਮੰਦਾਨਾ ਨੂੰ ਹਿੰਦੀ ਭਾਸ਼ਾ ਦੇ ਬੋਲਣ ਦੇ ਅੰਦਾਜ਼ (ਐਕਸੈਂਟ) ਕਾਰਨ ਸੋਸ਼ਲ ਮੀਡੀਆ 'ਤੇ ਟ੍ਰੋਲ ਕੀਤੇ ਜਾਣ ਤੋਂ ਬਾਅਦ ਜਾਣੇ-ਪਛਾਣੇ ਗੀਤਕਾਰ ਅਤੇ ਲੇਖਕ ਜਾਵੇਦ ਅਖ਼ਤਰ ਉਨ੍ਹਾਂ ਦੇ ਸਮਰਥਨ ਵਿੱਚ ਆਏ ਹਨ। ਜਾਵੇਦ ਅਖ਼ਤਰ ਨੇ ਅਦਾਕਾਰਾ ਦਾ ਮਜ਼ਾਕ ਉਡਾਉਣ ਵਾਲਿਆਂ ਦੀ ਆਲੋਚਨਾ ਕਰਦਿਆਂ ਅਜਿਹੇ ਰਵੱਈਏ ਨੂੰ "ਝੂਠਾ ਭਾਸ਼ਾਈ ਹੰਕਾਰ" ਕਰਾਰ ਦਿੱਤਾ ਹੈ। ਇਹ ਪੂਰਾ ਮਾਮਲਾ ਉਦੋਂ ਸਾਹਮਣੇ ਆਇਆ ਜਦੋਂ ਫ਼ਿਲਮ 'ਐਨੀਮਲ' ਦੀ ਅਦਾਕਾਰਾ ਰਸ਼ਮਿਕਾ ਮੰਦਾਨਾ ਨੇ 'ਕੌਫ਼ੀ ਵਿਦ ਕਰਨ' ਸੀਜ਼ਨ 9 ਦੇ ਤਾਜ਼ਾ ਐਪੀਸੋਡ ਦੌਰਾਨ ਆਪਣੇ ਹਿੰਦੀ ਉੱਚਾਰਨ 'ਤੇ ਹੁੰਦੀ ਨਿਰੰਤਰ ਆਲੋਚਨਾ 'ਤੇ ਦੁੱਖ ਪ੍ਰਗਟਾਇਆ। ਆਪਣੇ ਪਤੀ ਅਤੇ ਅਦਾਕਾਰ ਵਿਜੇ ਦੇਵਰਕੋਂਡਾ ਨਾਲ ਸ਼ੋਅ 'ਚ ਪਹੁੰਚੀ ਰਸ਼ਮਿਕਾ ਨੇ ਕਿਹਾ ਕਿ ਉਨ੍ਹਾਂ ਨੂੰ ਇਹ ਸਮਝ ਨਹੀਂ ਆਉਂਦਾ ਕਿ ਲੋਕ ਉਨ੍ਹਾਂ ਦੇ ਬੋਲਣ ਦੇ ਢੰਗ 'ਤੇ ਵਾਰ-ਵਾਰ ਸਵਾਲ ਕਿਉਂ ਚੁੱਕਦੇ ਹਨ। ਸੋਸ਼ਲ ਮੀਡੀਆ 'ਤੇ ਟ੍ਰੋਲਰਾਂ ਨੂੰ ਦਿੱਤਾ ਜਵਾਬ ਜਾਵੇਦ ਅਖ਼ਤਰ ਨੇ ਐਕਸ (X) 'ਤੇ ਇੱਕ ਪੋਸਟ ਰਾਹੀਂ ਰਸ਼ਮਿਕਾ ਦੇ ਉੱਚਾਰਨ 'ਤੇ ਸਵਾਲ ਚੁੱਕਣ ਵਾਲਿਆਂ ਦੀ ਨਿਖੇਧੀ ਕੀਤੀ। ਉਨ੍ਹਾਂ ਸ਼ੁਰੂਆਤ ਵਿੱਚ ਲਿਖਿਆ ਕਿ ਜੋ ਲੋਕ ਉਨ੍ਹਾਂ ਦੇ ਐਕਸੈਂਟ 'ਤੇ ਸਵਾਲ ਚੁੱਕ ਰਹੇ ਹਨ, ਉਨ੍ਹਾਂ ਨੂੰ ਪਹਿਲਾਂ ਖ਼ੁਦ ਤਮਿਲ ਬੋਲ ਕੇ ਦੇਖਣੀ ਚਾਹੀਦੀ ਹੈ, ਜੋ ਦੁਨੀਆ ਦੀ ਸਭ ਤੋਂ ਪੁਰਾਣੀ ਬੋਲੀ ਜਾਣ ਵਾਲੀ ਭਾਸ਼ਾ ਹੈ। ਹਾਲਾਂਕਿ, ਜਦੋਂ ਇੱਕ ਸੋਸ਼ਲ ਮੀਡੀਆ ਯੂਜ਼ਰ ਨੇ ਉਨ੍ਹਾਂ ਨੂੰ ਸੁਧਾਰਦਿਆਂ ਦੱਸਿਆ ਕਿ ਰਸ਼ਮਿਕਾ ਤਮਿਲ ਅਦਾਕਾਰਾ ਨਹੀਂ ਹਨ, ਤਾਂ ਅਖ਼ਤਰ ਨੇ ਤੁਰੰਤ ਆਪਣੀ ਗ਼ਲਤੀ ਮੰਨ ਲਈ। ਆਪਣੀ ਗ਼ਲਤੀ ਸੁਧਾਰਦਿਆਂ ਜਾਵੇਦ ਅਖ਼ਤਰ ਨੇ ਲਿਖਿਆ, "ਮੈਨੂੰ ਅਫ਼ਸੋਸ ਹੈ, ਮੈਂ ਗ਼ਲਤ ਸੀ। ਮੈਂ ਉਨ੍ਹਾਂ ਨੂੰ ਨਿੱਜੀ ਤੌਰ ’ਤੇ ਨਹੀਂ ਜਾਣਦਾ। ਪਰ ਮੁੱਦਾ ਤਮਿਲ, ਤੇਲਗੂ, ਮਲਿਆਲਮ ਜਾਂ ਕੰਨੜ ਦਾ ਨਹੀਂ ਹੈ। ਜੇਕਰ ਕੋਈ ਸਾਡੀ ਭਾਸ਼ਾ ਆਪਣੇ ਖ਼ਾਸ ਅੰਦਾਜ਼ 'ਚ ਬੋਲਦਾ ਹੈ, ਤਾਂ ਸਾਨੂੰ ਉਸ ਦੀ ਤਾਰੀਫ਼ ਕਰਨੀ ਚਾਹੀਦੀ ਹੈ। ਵੈਸੇ, ਸਾਡੇ ਵਿੱਚੋਂ ਕਿੰਨੇ ਲੋਕ ਪੂਰੀ ਤਰ੍ਹਾਂ ਸਹੀ ਅੰਗਰੇਜ਼ੀ ਬੋਲਦੇ ਹਨ? ਜੇਕਰ ਕੋਈ ਅੰਗਰੇਜ਼ ਸਾਡਾ ਮਜ਼ਾਕ ਉਡਾਵੇ ਤਾਂ ਸਾਨੂੰ ਕਿਹੋ ਜਿਹਾ ਲੱਗੇਗਾ?" ਹਾਲ ਹੀ 'ਚ ਰਿਲੀਜ਼ ਹੋਈ ਹੈ ਜੋੜੀ ਦੀ ਫ਼ਿਲਮ ਜ਼ਿਕਰਯੋਗ ਹੈ ਕਿ ਰਸ਼ਮਿਕਾ ਮੰਦਾਨਾ ਅਤੇ ਵਿਜੇ ਦੇਵਰਕੋਂਡਾ ਦੀ ਨਵੀਂ ਫ਼ਿਲਮ 'ਰਣਬਲੀ' 16 ਅਕਤੂਬਰ ਨੂੰ ਸਿਨੇਮਾਘਰਾਂ 'ਚ ਰਿਲੀਜ਼ ਹੋਈ ਹੈ। ਫਰਵਰੀ 2026 ਵਿੱਚ ਹੋਏ ਵਿਆਹ ਤੋਂ ਬਾਅਦ ਇਸ ਜੋੜੀ ਦੀ ਇੱਕਠਿਆਂ ਇਹ ਪਹਿਲੀ ਫ਼ਿਲਮ ਹੈ।