ਇੰਜਣਾਂ ਦੀ ਘਾਟ ਕਾਰਨ ਤੇਜਸ MK-1A ਜਹਾਜ਼ਾਂ ਦੀ ਸਪਲਾਈ ਪ੍ਰਭਾਵਿਤ

ਮੱਧ ਪੂਰਬ ਵਿੱਚ ਚੱਲ ਰਹੇ ਯੁੱਧ ਦਾ ਅਸਰ ਭਾਰਤ ਦੇ ਰੱਖਿਆ ਖੇਤਰ ‘ਤੇ ਵੀ ਪੈਣਾ ਸ਼ੁਰੂ ਹੋ ਗਿਆ ਹੈ। ਤੇਜਸ ਲੜਾਕੂ ਜਹਾਜ਼ਾਂ ਲਈ ਇੰਜਣਾਂ ਦੀ ਸਪਲਾਈ ਅਸਥਾਈ ਤੌਰ ‘ਤੇ ਰੋਕ ਦਿੱਤੀ ਗਈ ਹੈ। ਇੰਜਣ ਸਪਲਾਈ ਕਰਨ ਵਾਲੀ ਅਮਰੀਕੀ ਕੰਪਨੀ General Electric ਨੇ Hindustan Aeronautics Limited ਨੂੰ ਸੂਚਿਤ ਕੀਤਾ ਹੈ ਕਿ ਮੌਜੂਦਾ ਹਾਲਾਤਾਂ ਵਿੱਚ ਤੁਰੰਤ ਡਿਲੀਵਰੀ ਸੰਭਵ ਨਹੀਂ ਹੈ। ਮੀਡੀਆ ਰਿਪੋਰਟਾਂ ਅਨੁਸਾਰ, ਇੰਜਣਾਂ ਦੀ ਸਪਲਾਈ ਹੁਣ ਸਾਲ ਦੇ ਅੰਤ ਤੱਕ ਹੀ ਹੋਣ ਦੀ ਉਮੀਦ ਹੈ। ਇਸ ਪ੍ਰੋਜੈਕਟ ਤਹਿਤ ਕੁੱਲ 113 ਇੰਜਣਾਂ ਦੀ ਸਪਲਾਈ ਲਈ ਇਕਰਾਰਨਾਮਾ ਕੀਤਾ ਗਿਆ ਸੀ। HAL ਨੇ ਮਾਰਚ 2026 ਤੱਕ ਭਾਰਤੀ ਹਵਾਈ ਸੈਨਾ ਨੂੰ 24 ਤੇਜਸ ਜਹਾਜ਼ ਸੌਂਪਣ ਦਾ ਲਕਸ਼ ਨਿਰਧਾਰਤ ਕੀਤਾ ਸੀ। ਹਾਲਾਂਕਿ, ਇੰਜਣਾਂ ਦੀ ਘਾਟ ਕਾਰਨ HAL ਇਸ ਸਮੇਂ ਨੌਂ ਤੇਜਸ MK-1A ਜਹਾਜ਼ਾਂ ਦੀ ਡਿਲੀਵਰੀ ਕਰਨ ਵਿੱਚ ਅਸਮਰੱਥ ਹੈ। ਇਸ ਦੌਰਾਨ ਪੰਜ ਜਹਾਜ਼ ਪੂਰੀ ਤਰ੍ਹਾਂ ਤਿਆਰ ਹਨ, ਜਦਕਿ 19 ਜਹਾਜ਼ਾਂ ਦੇ ਏਅਰਫ੍ਰੇਮ ਵੀ ਬਣ ਚੁੱਕੇ ਹਨ। ਜਾਣਕਾਰੀ ਅਨੁਸਾਰ, ਜੇ ਸਪਲਾਈ ਮੁੜ ਸ਼ੁਰੂ ਹੋ ਜਾਂਦੀ ਹੈ ਤਾਂ ਇਸ ਸਾਲ 24 ਇੰਜਣ ਅਤੇ ਅਗਲੇ ਸਾਲ ਤੱਕ 30 ਇੰਜਣ ਪ੍ਰਾਪਤ ਹੋ ਸਕਦੇ ਹਨ। ਇਸ ਤੋਂ ਬਾਅਦ ਕੰਪਨੀ ₹9,000 ਕਰੋੜ ਦੇ 113 ਇੰਜਣਾਂ ਦੇ ਸੌਦੇ ਨੂੰ ਅੱਗੇ ਵਧਾਉਣ ਯੋਗ ਹੋਵੇਗੀ। ਇਸ ਤੋਂ ਪਹਿਲਾਂ ਫਰਵਰੀ 2021 ਵਿੱਚ ਸਰਕਾਰ ਨੇ HAL ਨਾਲ 83 ਤੇਜਸ ਮਾਰਕ-1A ਜਹਾਜ਼ਾਂ ਦੀ ਖਰੀਦ ਲਈ ₹48,000 ਕਰੋੜ ਦਾ ਸਮਝੌਤਾ ਕੀਤਾ ਸੀ। ਪਰ ਅਮਰੀਕੀ ਇੰਜਣਾਂ ਦੀ ਸਪਲਾਈ ਵਿੱਚ ਹੋ ਰਹੀ ਦੇਰੀ ਕਾਰਨ HAL ਅਜੇ ਤੱਕ ਇੱਕ ਵੀ ਜਹਾਜ਼ ਹਵਾਈ ਸੈਨਾ ਨੂੰ ਸੌਂਪ ਨਹੀਂ ਸਕਿਆ। ਅੰਦਾਜ਼ਾ ਹੈ ਕਿ HAL 2028 ਤੱਕ ਭਾਰਤੀ ਹਵਾਈ ਸੈਨਾ ਨੂੰ ਸਾਰੇ ਜਹਾਜ਼ ਡਿਲੀਵਰ ਕਰ ਦੇਵੇਗਾ। ਇਸ ਪ੍ਰੋਜੈਕਟ ਲਈ ਕੰਪਨੀ ਨੂੰ GE ਵੱਲੋਂ ਪਹਿਲਾਂ ਹੀ ਚਾਰ ਇੰਜਣ ਮਿਲ ਚੁੱਕੇ ਹਨ।