ਵੈਨੇਜ਼ੁਏਲਾ ਮਾਮਲੇ ’ਚ ਟਰੰਪ ਦੀ ਸੋਚ ਨੂੰ ਹਵਾ ਦੇ ਰਿਹਾ ਹੈ ਕੈਨੇਡਾ: ਰੋਜ਼ਵੈੱਲ

ਓਟਵਾ, ਵੈਨੇਜ਼ੁਏਲਾ ਵਿੱਚ ਕੈਨੇਡਾ ਦੇ ਸਾਬਕਾ ਸਫੀਰ ਰਹਿ ਚੁੱਕੇ ਬੈੱਨ ਰੋਜ਼ਵੈੱਲ ਨੇ ਦੋਸ਼ ਲਗਾਇਆ ਹੈ ਕਿ ਕੈਨੇਡਾ ਇਸ ਦੱਖਣੀ ਅਮਰੀਕੀ ਦੇਸ਼ ਵਿੱਚ ਤਾਜ਼ਾ ਚੋਣਾਂ ਕਰਵਾਉਣ ਦੇ ਵਿਚਾਰ ਨੂੰ ਉਭਾਰ ਕੇ ਅਮਰੀਕਾ ਦੇ ਗੈਰ-ਜਮਹੂਰੀ ਇਰਾਦਿਆਂ ਦਾ ਸਾਥ ਦੇ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਇਹ ਰਵੱਈਆ ਅਮਰੀਕਾ ਦੇ ਸਾਬਕਾ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੀ ਵੈਨੇਜ਼ੁਏਲਾ ਪ੍ਰਤੀ ਸੋਚ ਨੂੰ ਹੋਰ ਮਜ਼ਬੂਤ ਕਰਦਾ ਹੈ। 2014 ਤੋਂ 2017 ਤੱਕ ਕੈਰਾਕਸ ਵਿੱਚ ਕੈਨੇਡਾ ਦੇ ਸਫੀਰ ਰਹੇ ਬੈੱਨ ਰੋਜ਼ਵੈੱਲ ਮੁਤਾਬਕ, ਕੈਨੇਡਾ ਨੂੰ ਨਵੀਆਂ ਚੋਣਾਂ ਦੀ ਮੰਗ ਕਰਨ ਦੀ ਬਜਾਏ 2024 ਦੀਆਂ ਚੋਣਾਂ ਵਿੱਚ ਵੈਨੇਜ਼ੁਏਲਾ ਦੇ ਲੋਕਾਂ ਵੱਲੋਂ ਚੁਣੇ ਗਏ ਆਗੂਆਂ ਨੂੰ ਸੱਤਾ ਸੰਭਾਲਣ ਵਿੱਚ ਮਦਦ ਕਰਨੀ ਚਾਹੀਦੀ ਹੈ। ਉਨ੍ਹਾਂ ਆਖਿਆ ਕਿ ਲੋਕਤੰਤਰ ਦਾ ਅਰਥ ਲੋਕਾਂ ਦੇ ਫੈਸਲੇ ਦਾ ਆਦਰ ਕਰਨਾ ਹੁੰਦਾ ਹੈ, ਨਾ ਕਿ ਬਾਹਰੀ ਦਬਾਅ ਰਾਹੀਂ ਨਤੀਜੇ ਬਦਲਣੇ। ਰੋਜ਼ਵੈੱਲ ਇਹ ਪ੍ਰਤੀਕਿਰਿਆ ਮੰਗਲਵਾਰ ਨੂੰ ਕੈਨੇਡਾ ਦੀ ਵਿਦੇਸ਼ ਮੰਤਰੀ ਅਨੀਤਾ ਆਨੰਦ ਵੱਲੋਂ ਜਾਰੀ ਬਿਆਨ ’ਤੇ ਦੇ ਰਹੇ ਸਨ। ਆਪਣੇ ਬਿਆਨ ਵਿੱਚ ਆਨੰਦ ਨੇ ਕਿਹਾ ਸੀ ਕਿ ਅਮਰੀਕਾ ਦੇ ਵਿਦੇਸ਼ ਮੰਤਰੀ ਮਾਰਕੋ ਰੂਬੀਓ ਦਾ ਮੰਨਣਾ ਹੈ ਕਿ ਵੈਨੇਜ਼ੁਏਲਾ ਦੇ ਰਾਸ਼ਟਰਪਤੀ ਨਿਕੋਲਸ ਮਾਦੁਰੋ ਦੇ ਫੜ੍ਹੇ ਜਾਣ ਤੋਂ ਬਾਅਦ ਨੇੜਲੇ ਭਵਿੱਖ ਵਿੱਚ ਦੇਸ਼ ਦੇ ਲੋਕਾਂ ਕੋਲ ਆਪਣਾ ਨਵਾਂ ਆਗੂ ਚੁਣਨ ਦਾ ਰਾਹ ਮੋਕਲਾ ਹੋ ਗਿਆ ਹੈ। ਸਾਬਕਾ ਸਫੀਰ ਦੇ ਬਿਆਨਾਂ ਤੋਂ ਬਾਅਦ ਕੈਨੇਡਾ ਦੀ ਵਿਦੇਸ਼ ਨੀਤੀ ਅਤੇ ਵੈਨੇਜ਼ੁਏਲਾ ਪ੍ਰਤੀ ਉਸਦੇ ਰੁਖ ’ਤੇ ਸਿਆਸੀ ਅਤੇ ਕੂਟਨੀਤਿਕ ਹਲਕਿਆਂ ਵਿੱਚ ਨਵੀਂ ਚਰਚਾ ਛਿੜ ਗਈ ਹੈ।